26% samdráttur í aflaverðmæti í ágúst

Verðmæti landaðs afla í ágúst 2024 var um 14,8 milljarðar króna samkvæmt bráðabirgðatölum Hagstofu Íslands. Um er að ræða 26% minna aflaverðmæti en í ágúst 2023, að því er fram kemur í tilkynningu á vef stofnunarinnar.

Þetta er þó aðeins minni samdráttur en í tilfelli aflamagns sem var 30%. Heildarafli íslensku skipanna í ágúst síðastliðnum nam 80.526 tonnum en var 115.735 tonn í sama mánuði á síðasta ári.

Áberandi samdráttur var til að mynda í makrílafla sumarvertíðarinnar og var hann aðeins tæp 42 þúsund tonn í ágúst síðastliðnum en 71 þúsund tonn í sama mánuði í fyrra. Einnig sást verulegur samdráttur í síldarafla eða tæp fimm þúsund tonn. Þá var landað 2.869 tonnum af ufsa í ágúst síðastliðnum en tæplega 5.600 tonnum í sama mánuði í fyrra.

Þorskaflinn í ágúst jókst um 7% milli ára og ýsuaflinn um 22%. Auk þess var landað meira af gulllax, steinbít, löngu og skarkola. Þessi aflaaukning verðmætari tegunda hefur líklega vegið upp á móti samdrættinum í öðrum tegundum sem gerir að verkum að samdrátturinn í aflaverðmæti er minna en í aflamagni.

Fram kemur í tilkynningu Hagstofunnar að aflaverðmæti á 12 mánaða tímabilinu frá september 2023 til ágúst 2024 nam rúmlega 169 milljörðum króna. Það er um 19% minna aflaverðmæti miðað við sama tólf mánaða tímabil á undan.

• Blogga um frétt