Sögu forðað frá glötun

Níels Árni Lund hefur sent frá sér bókina „Fólkið frá Vörum í Garði og útgerð Gunnars Hámundarsonar“. Þar rekur hann fjölskyldusögu ábúenda í Vörum, einkum útvegsbændanna Halldórs Þorsteinssonar og Kristjönu Pálínu Kristjánsdóttur, og afkomenda þeirra.

„Mér finnst ákaflega mikilvægt að sögu þjóðar okkar sé haldið til haga og hún verður ekki til sem saga af einum manni heldur þarf að skrifa um venjulegt fólk, störf þess og líf, og saga Varahjónanna er dæmi um það. Verði sögunni ekki gerð skil, skrifuð niður, hverfur hún í tímans rás,“ segir hann um bókina í Morgunblaðinu í dag.

Útvegshjónin Halldór og Kristjana Pálína á 80 ára afmæli hennar.

„Mikil vinna var í Vörum og krakkarnir fóru að hjálpa til um leið og þeir gátu,“ segir Níels Árni og leggur áherslu á að Varir hafi verið algjört regluheimili. Eftir að Halldór hætti á sjónum og einbeitti sér að rekstrinum hafi synir hans tekið við veiðunum. Halldór hafi alla tíð verið einn af máttarstólpum byggðarlagsins og þau hjónin verið mjög virk í félagsstörfum.