Enn óvissa um framsal Watsons til Japans
Setja bókamerki
Ekkert liggur fyrir um nákvæmlega hvenær Peter Hummelgaard dómsmálaráðherra Danmerkur mun taka afstöðu til beiðni Japans um að fá hvalfriðunarsinnan Paul Watson framseldan. Þannig má skilja svar danska dómsmálaráðuneytisins við fyrirspurn 200 mílna.
Gæsluvarðhald yfir Watson var í gær framlengt í fimmta sinn af héraðsdómstólnum í Nuuk á Grænlandi og mun hann vera í haldi þarlendra yfirvalda til að minnsta kosti 4. Desember.
Watson, sem verður 74 ára 2. desember, hefur verið í haldi grænlenskra yfirvalda frá 21. Júlí síðastliðnum vegna alþjóðlegrar handtökuskipunar sem gefin var út að beiðni Japans. Er honum gefið að sök að hafa unnið skemmdir á japönsku hvalveiðiskipi árið 2010.
„Japönsk yfirvöld hafa farið fram á að Paul Watson verði framseldur til saksóknar í Japan. Dómsmálaráðuneytinu hafa nýlega borist greinargerðir frá ríkissaksóknara og lögreglunni á Grænlandi sem báðar hafa farið með rannsókn málsins. Dómsmálaráðuneytið hefur yfirferð framsalsbeiðninnar og greinargerðanna tveggja og mun ráðuneytið taka ákvörðun um málið á þeim grundvelli. Verði tekin ákvörðun um framsal er hægt að bera ákvörðunina fyrir dómstólum,“ segir í svari danska dómsmálaráðuneytisins.
Talinn líklegur til að flýja
„Japanskar hvalveiðar voru dæmdar ólöglegar árið 2014. Þú vilt halda mér frá börnunum mínum um jólin. Enginn slasaðist þá. Þetta er alveg fáránlegt,“ sagði Watson fyrir dómara í gær. Lýsti grænlenski fréttamiðillinn Sermitsiaq því að Watson hafi verið í miklu uppnámi.
Hefur miðillinn eftir Mariam Khalil yfirsaksóknara að það séu engin meðalhófssjónarmið sem gefa tilefni til að sleppa Watson úr haldi. Ljóst sé að það séu miklar líkur á að hann muni reyna að komast af landi brott ef hann verði látinn laus ferða sinna.
Þekktur fyrir skemmdarverk
Þetta er ekki í fyrsta sinn sem Watson er talinn hafa unnið skemmdarverk sem lið í friðunarbaráttu sinni, en útsendarar samtaka hans Sea Shepherd sökktu tveimur hvalveiðiskipum í Reykjavíkurhöfn 1986 með því að opna botnlokur þeirra. Jafnframt brutust þeir inn í hvalstöðina í Hvalfirði og unnu þar skemmdir á tækjum og búnaði.
Hann boðaði komu sína til Íslands 2019 í þeim tilgangi að berjast gegn hrefnuveiðum en ekkert varð af hrefnuveiðum það ári.
Síðast tilkynnti Watson að hann myndi sjálfur leiða aðgerðum baráttuhópsins Paul Watson-samtökin gegn hvalveiðum Íslendinga sumarið 2024. Matvælaráðuneytið hafði þó ekki afgreitt umsókn Havls hf. um leyfi til hvalveiða áður en sumarvertíðin átti að hefjast. Hafði verið pattstaða í málinu frá því að Svandís Svavarsdóttir, þáverandi matvælaráðherra, stöðvaði útgáfu veiðileyfis 2023.
Bjarni kominn á Bessastaði
Ætlar ekki að mynda ríkisstjórn í viðtali
Óskað eftir endurtalningu í Suðvesturkjördæmi
Gular viðvaranir taka gildi
Biden veitti syni sínum sakaruppgjöf
Handleggur að vinna úr högginu
Fimmta hvert atkvæði dautt í Reykjavík norður
