Flotinn landaði 22% minni afla

Íslenski fiskiskipaflotinn landaði 96 þúsund tonna afla í október og er það 22% minni afli en í sama mánuði 2023. Munar mest um kolmunna og síld auk þess sem var verulegur samdráttur í ufsa. Þetta má lesa úr tölum sem birtar voru á vef Hagstofu Íslands.

Botnfiskafli hélst nánast óbreyttur í 40 þúsund tonnum. Jókst ýsuaflinn um 4% og þorskaflinn um 2% á meðan jafn mikið var landað af karfa í október síðastliðnum og október í fyrra. Samdráttur varð hins vegar í ufsa og var aðeins landað 2.900 tonnum af þeirri tegund í október sem er 35% minna en á síðasta ári.

Frétt af mbl.is

31% meiri afla landað í Grindavík

Þá dróst síldaraflinn saman um tæplega helming og endaði í 19.797 tonnum. Samdráttur varð einnig í kolmunna og var aflinn 19% minni í október en í sama mánuði 2023.

Aflamagn á tólf mánaða tímabilinu frá nóvember 2023 til október 2024 var um 973 þúsund tonn sem er 29% minni afli en á 12 mánaða tímabili á undan. Rekja má megnið af samdrættinum til loðnubrests síðasta vetur.

• Blogga um frétt