Sverrir formaður saltfiskframleiðenda

Sverrir Haraldsson frá Vinnslustöðinni í Vestmannaeyjum var kjörinn formaður Íslenskra saltfiskframleiðenda (ÍSF) á aðalfundi félagsins sem haldinn var 7. nóvember samhliða Sjávarútvegsráðstefnunni, að því er segir í fréttatilkynningu frá ÍSF.

Þá var Jóhann Helgason frá Vísi í Grindavík kjörinn varaformaður og Gunnlaugur Eiríksson frá Þorbirni í Grindavík er gjaldkeri. Meðstjórnendur eru Arkadiusz Lakomski frá KG Fiskverkun í Rifi, Ágúst Már Gunnlaugsson frá GPG Seafood á Húsavík, Mjöll Guðjónsdóttir frá Soffaníasi Cecilssyni í Grundarfirði og Níels A. Guðmundsson frá Iceland Seafood. Sigurjón Arason frá Matís er stjórninni til ráðgjafar, eins og hann hefur verið frá upphafi félagsins.

ÍSF er vettvangur framleiðenda saltaðra fiskafurða og er ætlað að vinna að sameiginlegum hagsmunamálum og stuðla að rannsóknum og þróun í greininni. „Fyrirtækjum í söltun sjávarafurða hefur fækkað mjög á undanförnum árum en engu að síður er enn til staðar öflug framleiðsla og útflutningur saltfiskafurða frá Íslandi,“ segir í tilkynningunni.

Greindu frá saltfiskverkefnum

Einn helsti samstarfsaðili ÍSF frá stofnun 2008 hefur verið Matís sem unnið hefur fjölmörg rannsóknaverkefni í samstarfi við félagið og var á aðalfundinum flutt tvö erindi um slík samstarfsverkefni.

Davíð Gíslason, verkefnastjóri hjá Matís fór yfir stöðu verkefnisins „Saltfisksvindl - Eftirlit og upprunavottun fyrir Íslenskar saltfiskafurðir“. Verkefnið er unnið af Matís, í samstarfi við saltfiskframleiðendur og er markmið að þróa skilvirkar aðferðir til að greina og sannreyna uppruna saltfisks.

„Nú þegar hefur verkefnið leitt í ljós áhugaverðar staðreyndir í þessum efnum. Verkefnið er enn í vinnslu og endanlegra niðurstaðna er að vænta fljótlega,“ segir í tilkynningunni.

Kolbrún Sveinsdóttir flutti erindi á fundinum. Ljósmynd/ÍSF

Þá flutti Kolbrún Sveinsdóttir erindið „Er saltfiskur í boði“. Kolbrún er verkefnastjóri hjá Matís og gestaprófessor við matvæla- og næringarfræðideild á Heilbrigðisvísindasviði Háskóla Íslands. Hún hefur í starfi sínu hjá Matís stýrt saltfisktengdum verkefnum Matís sem hún greindi frá í erindi sínu.

„Matís gerði árið 2019, könnun á neyslu viðhorfum gagnvart saltfiski og voru niðurstöður þeirrar könnunar afar áhugaverðar. Ímynd saltfisks á Íslandi skiptir miklu máli fyrir útflutning og markaðsstarf erlendis. Saltfiskur er sögu- og menningarleg arfleifð sem Íslendingar eiga að vera stoltir af.“

• Blogga um frétt