Verðhækkanir líklega vegna skorts

Meðalverð á þorski og ýsu sem selst á fiskmörkuðum landsins hefur aukist með áberandi hætti frá upphafi fiskveiðiársins 24/25. Mest hefur verð á slægðri ýsu aukist en hækkunin nemur tæplega 43%.

Þetta er meðal þess sem má lesa úr gögnum Reiknistofu fiskmarkaða (RSF), en hægt er að fylgjast með verðþróun á afurðaverðssíðu 200 mílna.

Athygli vekur að minna en helmingur þess magns af þorski og ýsu sem fór á fiskmarkaði í september og október hefur ratað á markaðina það sem af er nóvember, þrátt fyrir að meira en helmingur af mánuðinum er liðinn. Má ætla að framboð hafi haft þó nokkur áhrif á verð.

Miklar sveiflur

Í september var meðalverð á óslægðum þorski tæpar 508 krónur á kíló og hefur hækkað lítillega, en það sem af er nóvember hefur meðalverð á óslægðum þorski verið um 547 krónur. Nokkuð meiri hækkun hefur verið í slægðum þorski og hefur meðalverðið aukist um rúm 25% úr um það bil 444 krónum á kíló í 556 krónur.

Sem fyrr segir hefur átt sér stað myndarleg hækkun meðalverðs ýsu og hefur óslægð ýsa verið seld fyrir 348 krónur á kíló það sem af er nóvember, en í september nam meðalverðið um 260 krónur. ‚a sama tíma hefur meðalverð á slægðri ýsu aukist úr 234 krónum í septemebr í 334 krónur á kíló það sem af er nóvember.

• Blogga um frétt