Á fyrstu þrem ársfjórðungum 2024 hefur Kaldvík slátrað 8.298 tonnum af laxi úr kvíum sínum á Austfjörðum og er það umtalsvert meira en á sama tímabili í fyrra er slátrað var 4.395 tonnum. Þá voru tekjur 60,9 milljónir evra, jafnvirði tæpra 9 milljarða króna, en var 39,9 milljónir evra á fyrstu þrem ársfjórðungum í fyrra.

Þetta má lesa úr uppgjöri Kaldvíkur vegna þriðja ársfjórðungs 2024.

Fram kemur að 3.798 tonnum var slátrað í fjórðungnum og að tekjur voru 24,5 milljónir evra. Þá greiddi félagið tæplega 950 þúsund evrur í eldisgjald og var rekstrarhagnaðurinn (EBIT) um 2,1 milljón.

Nýttu vaxtartíma haustsins

Fyrirtækið gerir ráð fyrir að slátra um 6.700 tonnum á fjórða ársfjórðungi. Þá er ætlað að framaleiðsla ársins 2024 nái um 15 þúsund tonnum, sem er þó um 2.500 tonnum minna en gert var ráð fyrir í síðustu áætlun. Kaldvík er með markmið um að koma framleiðslunni í 30 þúsund tonn.

Greint er frá því í uppgjörinu að Kaldvík hafi tekið ákvörðun um að breyta skipulagi slátrunnar í þeim tilgangi að hámarka framleiðslu og arðsemi. „Verð á 3. ársfjórðungi var lægra en búist var við ásamt því að 3. ársfjórðungur er góður vaxtarfjórðungur fyrir fiskinn. Ákvörðun um að seinka hluta af fyrirhuguðu sláturmagni mun þannig gera okkur kleift að nýta vaxtarskeiðið í sjó og hámarka verð.“

Jafnframt segir að aldrei hafi heilsa fiska í kvíum Kaldvíkur verið betri en á þriðja ársfjórðungi. „Allan fjórðunginn sáum við takmarkaða dánartíðni og gæði fisksins eru góð. Það gladdi okkur að sjá takmörkuð áhrif vegna árstíma þar sem marglyttur eru algengar, sem við rekjum til aðgerða sem gripið hefur verið til til að takmarka líffræðilega áhættu með tilliti til marglyttna,“ segir í uppgjörinu.

Kaldvík AS er eignarhaldsfélag sem fer með alla hluti í Kaldvík hf. (áður Fiskeldi Austfjarða hf.) og  66,7% hlut í Búlandstindi ehf.

„Þetta er fín niðurstaða sér­sta­kelga þegar litið er til hvernig verðið þróaðist í árs­fjórðungn­um. Með auk­inni fram­leiðslu þá náum við betri nýt­ingu á slát­ur­stöð og brunn­bát­um fé­lags­ins,"seg­ir Ró­bert Ró­berts­son fjár­mála­stjóri Kald­vík­ur.

„Þá er virki­lega gott að sjá að þær fjár­fest­ing­ar sem við höf­um lagt í síðustu miss­eri og ár eru að skila sér í betri gætðum, en eins og kom fram í upp­gjör­inu þá er lif­un í sjó síðustu 12 mánuði í kring­um 94%, sem er frá­bært.“ 

Uppfært kl 13:25. Framleiðslutölur og afkoma á þirðja ársfjórðungi sem fyrst var vísað til byggði á gögnum um sama ársfjórðung á síðasta ári. Tölurnar hafa verið uppfærðar þannig að upplýsingarnar sýni niðurstöðu á þriðja ársfjórðungi 2024.

Tengdar fréttir

Fiskeldi

Aldrei meira af íslenskum eldisfiski

• Laxey fjárfestir í búnaði frá Marel
• Framleiddu 502 þúsund tonn af laxi
• Opnar kvíar bannaðar á vesturströnd BNA
• Magdalena nýr forstöðumaður hjá AF

» Fleiri tengdar fréttir

• Blogga um frétt