Líklega fyrsti túr Gullvers á Dohrnbanka

Ísfisktogarinn Gullver NS kom til löndunar í Hafnarfirði í gærmorgun með 103 tonna afla, þar af voru 56 tonn karfi, 28 þorskur og 18 ufsi.

„Þetta var tæplega viku túr. Við fórum suður fyrir og síðan vestur fyrir land fyrst og fremst í þeim tilgangi að leita að karfa. Við hófum veiðar í Reynisdýpi og vorum þar eina nótt en þar fékkst ufsi. Síðan var haldið í Víkurálinn og fékkst karfi þar í og við Nætursöluna. Loks var haldið út á Dhornbanka en þar fengum við þorsk,“ segir Hjálmar Ólafur Bjarnason skipstjóri í færslu á vef Síldarvinnslunnar.

Hann segir Gullver líklega aldrei hafa komið á Dohrnbankann áður. „Við vorum nánast allan túrinn í ágætisveðri og við getum í reynd ekki kvartað undan neinu nema hvað að siglingarnar voru býsna langar,” segir Hjálmar Ólafur.

Gullver hélt á ný til veiða síðdegis í gær og var stefnt að því að halda áfram að afla karfa.

• Blogga um frétt