„Þetta var semsagt helvítis brælutíð“

„Það gekk vel að veiða þegar það var hægt. Veðrið var afar óhagstætt,“ er haft eftir Tómasi Kárasyni skipstjóra á Beiti NK í færslu á vef Síldarvinnslunnar um síðasta túr. Skipið kom til hafnar í Neskaupstað með 2.800 tonn af kolmunna úr færeyskri lögsögu.

„Við byrjuðum túrinn á að liggja í vari í Færeyjum í tvo daga og áður en siglt var heim lágum við í tæpan sólarhring í Borðeyjarvík austan Klakksvíkur í vari. Þá stoppuðum við einu sinni á miðunum í 12 tíma og biðum af okkur versta veðurhaminn. Þetta var semsagt helvítis brælutíð en það fiskaðist hinsvegar vel þegar hægt var að veiða. Við fengum aflann í sex holum og holin gáfu frá 290 tonnum og upp í 600 tonn. Venjulega var dregið í 10 – 12 tíma. Veiðisvæðið var um 70 mílur austur af Færeyjum,” segir Tómas.

Að lokinni löndun hélt Beitir til síldarveiða á miðunum vestur af landinu. Gert er ráð fyrir því að haldið verði á ný á kolmunnamiðin þegar þeirri veiðiferð lýkur.

Tómas fer þó ekki vestur á síldarveiðar því hann fór til Danmerkur ásamt hópi skipstjórnarmanna sem leggja leið sína til Hirtshals þar sem tilraunir eru gerðar með veiðarfæri í sérstökum tilraunatanki. Ferðin er skipulögð af Hampiðjunni.

• Blogga um frétt