Haf­rann­sókna­stofn­un hef­ur fengið 40 millj­ón­ir króna styrk til að fram­kvæma grunn­rann­sókn­ir á líf­fræði Hval­fjarðar. Styrk­veit­and­inn er Röst sjávar­rann­sókna­set­ur og kem­ur upp­hæðin til viðbót­ar við 60 millj­óna króna styrk sem Röst veitti stofn­un­inni fyrr á þessu ári, að því er seg­ir í frétta­til­kynn­ingu.

Verk­efnið fel­ur í sér að Haf­rann­sókna­stofn­un geri víðtæk­ar rann­sókn­ir til að meta nú­ver­andi ástand upp­sjáv­ar og botn­lægs vist­kerf­is í Hval­f­irði. Verða meðal ann­ars fram­kvæmd­ar berg­máls­mæl­ing­ar, svif­dýra­sýna­taka, þör­unga­grein­ing­ar og erfðaefni úr plönt­um og líf­ver­um safnað.

„Von­ir standa til að eft­ir að verk­efn­inu lýk­ur verði Hval­fjörður­inn einn best rann­sakaði fjörður lands­ins. Mark­mið rann­sókn­anna er að afla grunn­gagna sem mik­il­væg eru vegna fyr­ir­hugaðra rann­sókna Rast­ar á sviði auk­inn­ar basa­virkni sjáv­ar (e. Oce­an Alkalinity En­hancement, OAE),“ seg­ir í til­kynn­ing­unni.

Frétt af mbl.is

Fær 60 millj­óna styrk til að rann­saka Hval­fjörð

Næsti leiðang­ur helgaður hafs­botni

„Til að rann­saka vist­kerfi sjáv­ar er nauðsyn­legt að taka til­lit til allra þeirra þátta sem geta haft áhrif á mót­un þeirra. Til að fá skýra mynd af líf­fræði Hval­fjarðar eru marg­ir mis­mun­andi þætt­ir skoðaðir sem all­ir tengj­ast hver öðrum á ein­hvern hátt. Fyrsti leiðang­ur­inn var núna í byrj­un októ­ber en mik­il reynsla bæði áhafn­ar og rann­sókn­ar­fólks ásamt góðu veðri varð til þess að leiðang­ur­inn heppnaðist ótrú­lega vel,“ er haft eft­ir Bylgju Sif Jóns­dótt­ur leiðang­urs­stjóra.

Hún seg­ir næsta leiðang­ur vera helgaður mynda­tök­um af hafs­botni í Hval­f­irði og líf­rík­inu sem þar kann að finn­ast. „Einnig verður kafað eft­ir kór­alþör­unga­sýn­um næsta vor ásamt því að rann­saka þangið og þarann í fjör­unni. Það verður spenn­andi að sjá niður­stöðurn­ar og gam­an að fá að vera part­ur af því að gera svona víðtæka rann­sókn á heil­um firði.“

Leiðang­urs­menn á Bjarna Sæ­munds­syni taka inn sýni úr Hval­f­irðinum. Ljós­mynd/​Aðsend

Verk­efnið mun standa fram á næsta ár. Ætl­un­in er að gögn verk­efn­is­ins verði aðgengi­leg í heild sinni, þar á meðal í gagna­grunni Seanoe. Einnig mun Haf­rann­sókna­stofn­un birta ít­ar­lega skýrslu og miðla niður­stöðunum.

„Verk­efnið á að leiða til dýpri þekk­ing­ar á líf­fræði fjarðar­ins og bæt­ist við þekk­ingu úr rann­sókn­um á haffræði Hval­fjarðar sem Haf­rann­sókna­stofn­un hóf fyrr á ár­inu með styrk frá Röst. Þær rann­sókn­ir eru enn í gangi og munu standa fram í maí 2025,“ seg­ir í til­kynn­ing­unni.

Þörf á rann­sókn­um

Röst sjávar­rann­sókna­set­ur er sagt „ný­lega stofnað óhagnaðardrifið rann­sókn­ar­fé­lag sem hef­ur það hlut­verk að stuðla að rann­sókn­um sem tengj­ast haf­inu og lofts­lags­breyt­ing­um. Röst er hluti af alþjóðlegu neti rann­sókna­stöðva und­ir hatti Car­bon to Sea Initiati­ve. Car­bon to Sea er óhagnaðardrif­in banda­rísk sjálf­seign­ar­stofn­un sem er starf­rækt með stuðningi góðgerðasam­taka og vís­inda­sjóða á sviði lofts­lags­mála.“

Stofn­un­in leiðir áætl­un sem ætlað er að kanna hvort aukn­ing á basa­virkni sjáv­ar sé skil­virk og ör­ugg var­an­leg leið til þess að fjar­lægja kol­díoxíð úr and­rúms­loft­inu. Röst er dótt­ur­fé­lag ís­lenska lofts­lags­fyr­ir­tæk­is­ins Transiti­on Labs.

Salome Hall­freðsdótt­ir, fram­kvæmda­stjóri Rast­ar, seg­ir í til­kynn­ing­unni mikla þörf á rann­sókn­um sem tengj­ast haf­inu og lofts­lags­breyt­ing­um. „Til að mynda hvað varðar áhrif súrn­un­ar sjáv­ar á líf­ver­ur og vist­kerfi hafs­ins, en einnig er mik­il­vægt að kanna hvort og hvernig hafið geti hjálpað okk­ur við að draga úr lofts­lags­breyt­ing­um.“

Tengd­ar frétt­ir

Haf­rann­sókna­stofn­un

Fyrsta marsralli Þór­unn­ar lokið

• Frum­kvöðull með smit­andi áhuga
• Spara hundruð tonna af olíu ár­lega
• Sögu­leg tíma­mót ís­lenskra haf­rann­sókna
• Er ólíkt rann­sókn­ar­skip­um annarra þjóða

» Fleiri tengd­ar frétt­ir

• Blogga um frétt