„Lentum í dálitlu íshavaríi“

„Hann gekk þokkalega og veðrið var í lagi lengst af, en skítabræla í restina,“ segir Hjálmar Ólafur Bjarnason skipstjóri á Gullver NS um síðasta túr togarans í færslu á vef Síldarvinnslunnar. Gullver landaði 95 tonnum á Grundarfirði í gær og var aflinn mest gullkarfi og þorskur.

„Við byrjuðum og enduðum túrinn á Nætursölunni en í millitíðinni var verið á Dohrnbankanum þar sem við lentum í dálitlu íshavaríi. Við munum taka einn túr í viðbót hér vesturfrá,” segir Hjálmar Ólafur.

Greint var frá því í síðustu viku að það væri töluverður hafís að færast inn á miðin vestur af landinu.

Frétt af mbl.is

„Hann var helvíti kaldur sjórinn þarna“

Þá landaði Vestmannaey VE 53 tonnum í Neskaupstað í gær, að mestu þorsk og ýsu. Togarinn kom þó fyrr til löndunar en ætlað var vegna veðurs.

„Við fengum góðan afla á Glettinganesflakinu en svo brældi og þá fórum við inn til Neskaupstaðar, lönduðum og biðum af okkur veðrið. Þegar veðrið gekk niður var haldið út á ný. Togað var á Gerpisgrunni í nótt og nú er verið að leita að ýsu á Skrúðsgrunni,” er haft eftir Valtý Bjarnasyni, stýrimanni á Vestmannaey, í færslunni.

70 tonn í Vestmannaeyjum

Í dag kom síðan Bergur VE til hafnar í Vestmannaeyjum mep 70 tonn og var afli skipsins að mestu þorskur og ýsa.

„Við byrjuðum á Gula teppinu og síðan var verið að við Hvalbak. Að því kom að farið var norður á Gletting og þar fékkst bæði þorskur og ýsa. Síðan var haldið suður fyrir land og verið alveg kloss við ströndina í skjóli fyrir veðrinu. Þar fengum við þorsk og ufsa á Víkinni og loks var endað á Reynisdýpinu,” segir Jón Valgeirsson, skipstjóri á Bergi, í færslunni.

Bergur kom til hafnar í Vestmannaeyjum í dag. Ljósmynd/Egill Guðni Guðnason

• Blogga um frétt