Vel heppnað loðnueldi
Setja bókamerki
Vísindamenn á tilraunaeldisstöð Hafrannsóknastofnunar hafa í fyrsta sinn ræktað loðnu frá klaki til fullorðinsaldurs í eldisumhverfi, að því er segir á vef Hafrannsóknastofnunar. Fram kemur að loðnuhrogn voru frjóvguð um borð í Víkingi AK-100, uppsjávarskipi Brims hf., og voru síðan flutt þaðan í tilraunaeldisstöðina á Stað við Grindavík. Þar klöktust lirfurnar út 30 dögum síðar.
Greint er frá því að ræktun loðnulirfanna hafi byggst á sambærilegum eldisaðferðum og hafa verið þróaðar í eldisstöðinni til eldis á þorski með góðum árangri. „Við stöðugt hitastig (7°C) var vöxtur loðnunnar jafn og ör, og fyrstu loðnurnar náðu kynþroska aðeins ári frá klaki. Á öðru ári dró úr vexti, og loðnan náði hámarkslengd, 18,4 cm, á aðeins 2,6 árum, sem er umtalsvert skemmri tími en hjá villtri íslenskri loðnu,“ segir í tilkynningunni.
Loðnan er afar viðkvæm fyrir meðhöndlun en stuttur líftími hennar gerir hana að efnilegu tilraunadýri, að mati vísindamanna.
Innsýn í vaxtar- og líffræði
Birt var grein um rannsóknina í vísindatímaritinu Fishes nýverið undir heitinu „Cultivation and Growth Dynamics of Capelin (Mallotus villosus) from Hatch to Adulthood“. Höfundar hennar eru Tómas Árnason, Birkir Bárðarson og Agnar Steinarsson.
Rannsóknin er sögð veita mikilvæga innsýn í vaxtarfræði og líffræði loðnunnar sem er mikilvæg tegund bæði sem hluti af vistkerfi sjávar en einnig sem nytjastofn. Einnig er rannsóknin talin leggja grunn að frekari loðnurannsóknum í tilraunaumhverfi.
Nú þegar hefur verið hafist handa við framkvæmd frekari loðnurannsókna í tilraunaeldisstöðinni og er gert ráð fyrir að niðurstöður þeirra verði birtar á næstu árum.
Þjóðvegur 1 fór í sundur á nokkrum stöðum
Ábatinn gæti verið meiri en áhættan
Skólanum lokað vegna músagangs
Skrifstofustjóri Ásthildar fór í karphúsið
Útilokað að kalla ísrétt bragðaref
Stórbætt eftirlit með nýjum ratsjám
Skemmdir á tækjum og búnaði á skíðasvæðinu
Vilja svör um hvort Ásthildur hafi boðið 2% hækkun