Hrun í ufsaaflanum í nóvember

Mjög illa virðist hafa gengið að veiða ufsa í nóvember síðastliðnum. Aflinn nam 2.093 tonnum sem er 38% minni afli en sama mánuð í fyrr þegar íslenski fiskiskipaflotinn bar 3.366 tonn af ufsa að landi, að því er fram kemur í talnagögnum sem Hagstofa Íslands birti á vef sínum í morgun.

Ekki hefur tekist að fullnýta heimildir í ufsa um árabil.

Íslenski fiskiskipaflotinn landaði tæplega 94 þúsund tonnum í nóvember og er það 7% meiri afli en í sama mánuði í fyrra. Aukninguna má rekja til stórfelldar aukningar í kolmunnaaflanum.

Í nóvember síðastliðnum var landað tæplega 32,5 þúsund tonnum af botnfiskafla, þar af var mest af þorski eða 18.711 tonn. Um er að ræða 13% minni botnfiskafla en í sama mánuði í fyrra og 16% minna af þorski. Einnig varð 11% samdráttur í ýsuafla.

Uppsjávaraflinn í síðasta mánuði var tæplega 60 þúsund tonn og er það næstum fjórðungi meiri afli en í nóvember 2023. Dróst síldaraflinn saman um 12% og endaði í 36 þúsund tonnum, en kolmunnaaflinn jókst um 224% og nam 23.549 tonn.

400 þúsund tonna samdráttur

Á tólf mánaða tímabilinu frá desember 2023 til nóvember 2024 var afli íslensku skipanna um 979 þúsund tonn, en var 1.380 þúsund tonn tólf mánaða tímabilið á undan. Samdráttinn má rekja til uppsjávarveiðanna og vegur loðnubrestur síðasta veturs þungt, en einnig dróst síldaraflinn saman um þriðjung og makrílaflinn um 37%.

Botnfiskaflinn jókst hins vegar um 4% á tímabilinu og skiptir þar ýsan mestu en aflinn fór úr 69,5 þúsund tonnum í rúm 83 þúsund tonn. Jókst þorskaflinn um 1% og nam hann 222,7 þúsund tonnum. einnig varð smávægileg aukning í karfa en samdráttur í ufsa.

• Blogga um frétt