Sturla til Grundarfjarðar sem Guðmundur

Guðmundur Runólfsson hf. (G.Run) á Grundarfirði mun festa kaup á togaranum Sturla GK-12 af Þorbirni hf. Guðmundur Smári Guðmundsson framkvæmdastjóri G.Run segir í samtali við 200 mílur skipið hafi verið tekið í slipp til skoðunar og nú sé bara eftir að undirrita kaupsamninginn og það verði gert á morgun.

Þegar kaupin eru frágengin mun Sturla fá nafnið Guðmundur SH en togarinn er systurskip Runólfs SH-135 sem G.Run gerir út. Voru báðir smíðaðir af Nordship í Póllandi fyrir Berg-Huginn í Vestmannaeyjum árið 2007 og voru gerðir út undir nöfnunum Bergey og Vestmannaey.

Guðmundur segir ánægjulegt að systurskipin verða sameinuð á ný og að ekki standi til að gera neinar sérstakar breytingar hjá fyrirtækinu aðrar en að yngja skipakostinn.

G.Run gengur frá kaupsamningi við Þorbjörn hf. á morgun. Mun Sturla GK í framhaldinu vera gerður út sem Guðmundur SH. mbl.is/Hafþór Hreiðarsson

Sturla GK, verðandi Guðmundur, er líkt og systurskipið Runólfur SH 28,93 metra langur, 10,39 metra breiður og telur 485,67 brúttótonn. Ekki er upplýst um kaupverð.

Mun nýr Guðmundur SH leysa af hólmi nóta- og togveiðiskipið Hring SH-153 sem smíðað var af M.c.fabrikations í Skotlandi árið 1997.

Þorbjörn, seljandi Sturlu, fékk nýverið afhentan nýjan togara Huldu Björnsdóttur GK.

Frétt af mbl.is

Gáttaðir á því hvað Hulda er gott sjóskip

• Blogga um frétt