310 milljónir króna í síðasta túr ársins

Afli í síðasta túr Blængs NK á árinu er 524 tonn og er verðmæti hans um 310 milljónir króna. Túrinn tók 26 daga og lauk um klukkan fimm síðdegis í gær.

Aflinn er blandaður, mest er af ýsu en síðan er uppistaðan þorskur, ufsi og grálúða, að því er fram kemur í færslu á vef Síldarvinnslunnar.

„Við vorum alfarið hér við Austur- og Suðausturlandið. Mest vorum við á Gerpisflaki, Glettinganesflaki og Tangaflaki en síðan fórum við einnig á Papagrunn þar sem við lentum í mjög góðu tveggja sólarhringa ufsaskoti. Sannleikurinn er sá að þessi síðasti túr ársins var hörkutúr. Vinnslan um borð gekk vel allan túrinn og aflinn var í reyndinni jafn og góður,“ segir Ólafur Hjálmarsson skipstjóri Blængs í færslunni.

Hann segir veðrið þó hafa mátt vera betra. „Það var bræla nánast allan tímann nema tvo síðustu dagana. Ég held að menn séu mjög sáttir við þessa veiðiferð og nú er ljúft og gott jólafrí framundan. Það verður haldið til veiða á ný að kvöldi annars janúar og fyrstu fjórir túrar nýs árs verða tiltölulega langir eða 35 til 40 dagar,” segir Bjarni Ólafur.

• Blogga um frétt