Frosti var inni á Seyðisfirði og var verið að þrífa skipið þegar atvikið átti sér stað. Var háseti að hella klór í þvottakar að afloknum þrifum fyrir landlegu. Karið var tómt og leit hann ofan í karið þegar sjó var hleypt í það. Við þetta skvettist sterk klórblanda í augu hásetans.

Aðrir í áhöfninni voru þó fljótir til og skoluðu augu hans nánast samstundis. Var Frosti kominn til hafnar á Seyðisfirði um 15 mínútum síðar þar sem sjúkrabifreið beið hásetans og kom honum undir læknishendur.

Fram kemur að hann hafi verið óvinnufær í þrjá daga eftir atvikið en hafi náð sér að fullu. „Skjót viðbrögð annarra skipverja og að hinum slasaða var fljótt komið undir læknishendur er stór þáttur í að ekki fór verr. Það ber að hrósa áhöfn fyrir skjót viðbrögð og að skipstjóri tilkynnti atvikið eftir örstutta stund.“

Hafa sett reglur

„Klórinn var af 15% styrkleika og er ætlast til að hann sé blandaður vatni. Á umbúðunum er tekið fram nota eigi augnhlífar, hlífðarhanska og hlífðarfatnað. Þegar slysið varð var klórnum hellt í tómt kar og blandan því sterkari á meðan sjó var hleypt á karið heldur en við hefðbundna notkun. Má leiða líkum að því að það hafi aukið á alvarleika atviksins,“ segir í skýrslu RNSA.

Hafa í kjölfar atviksins verið settar reglur um borð um notkun hlífðargleraugna auk þess að stútum í þvottakari var breytt á þann hátt að minni hætta er á að vatn geti skvest úr karinu.

Tengdar fréttir

Öryggi sjófarenda

Heppinn að hafa náð að kalla eftir hjálp

• Björgunarskipið Þór selt til Súðavíkur
• Líklega hjálmi að þakka að ekki fór verr
• Skipum fækkar ef fjármagn fæst ekki
• Dýrt að reka eina vél

» Fleiri tengdar fréttir