Pylsur á Brúarfossi á jóladag

Skipverjar á Brúarfossi náðu ekki að elda jólamat á jóladag og borðuðu pylsur í staðinn. Tafir vegna veðurs hafa gert það að verkum að þeir ná tæplega í land fyrir áramót.

Karl Guðmundsson er skipstjóri á Brúarfossi og eru þetta 30. jólin sem hann heldur upp á á hafi úti.

Skipið lagði í haf frá Reykja­vík á Þor­láks­messu og var leiðinlegt veður á aðfangadag, að sögn Karls. Gátu skipverjar þó glaðst yfir því að hamborgarhryggur var á boðstólum í tilefni jólanna.

„[...] en svo var svo mikill veltingur á jóladag að þá voru pulsur,“ segir Karl.

Pulsur eða pylsur eru dæmigerður brælumatur að hans sögn, þegar erfitt er að elda um borð þegar slæmt er í sjóinn.

„Þá er ómögulegt að vera með potta og pönnur úti um allt og halda sér,“ segir Karl. Best sé að hafa eldamennskuna sem einfaldasta.

Frétt af mbl.is

Feðgar saman í Grænlandstúr á jólum

Reyna að ná áramótum í landi

Karl var við suðurodda Grænlands þegar blaðamaður hafði samband. Hann segir að vegna veðurs hafi túrnum seinkað um einn og hálfan sólahring.

Stefnt sé á að reyna að ná áramótunum í landi, en vegna tafa sé það afar knappt. „Við verðum aftur í Reykjavík á gamlársdag eða nýársdag.“ Karl er ekki mikið að stressa sig yfir því, enda ýmsu vanur.

„Það er ekkert alltaf gott veður á jólunum. Það getur alveg hist þannig á að vera veðurtepptur og það séu tafir þannig að menn missi af jólunum og alls konar. Það er allt til í því,“ segir Karl að lokum.

• Blogga um frétt