Verðlaunuðu Klofning og Íslandssögu

Fiskvinnslan Íslandssaga og hausaþurrkunarfyrirtækið Klofningur á Suðureyri hlutu hvatningarverðlaun skóla-, íþrótta- og tómstundanefndar Ísafjarðarbæjar fyrir framúrskarandi skólaumhverfi 2024, að því er segir í tilkynningu á vef sveitarfélagsins.

Fram kemur að fyrirtækin hafa í meira en tvo áratugi boðið grunnskólanemum í heimsókn þar sem þau geta kynnst vinnslu og útgerð.

„Á hverju vori bjóða fyrirtækin nemendum í 1. bekk í Grunnskólanum á Ísafirði í sérstaka heimsókn auk þess að bjóða nemendum í Grunnskólanum á Suðureyri reglulega í heimsókn. Í heimsóknunum er fiskvinnslan skoðuð og nemendur sjá hvernig fisknum er breytt í verðmæta útflutningsvöru. Allir nemendur eru svo sendir heim með fisk í soðið sem þeir borða með bestu lyst. Oft tala nemendur um að þetta sé besti fiskur í heimi. Mikil tilhlökkun er meðal nemenda, kennara og jafnvel foreldra fyrir þessari heimsókn og í Íslandssögu og Klofningi kallast hún vorboðinn ljúfi,“ segir í tilkynningunni.

Nanný Arna Guðmundsdóttir, formaður skóla-, íþrótta- og tómstundanefndar, afhenti verðlaunin og þeir Óðinn Gestsson, framkvæmdastjóri Íslandssögu, og Einar Ómarsson hjá Klofningi tóku við þeim 14. janúar síðastliðinn. Einnig voru viðstaddar þær Hafdís Gunnarsdóttir, sviðsstjóri skóla- og tómstundasviðs, og Guðrún Birgisdóttir, skóla- og sérkennslufulltrúi.

Er þetta fjórða sinn sem verðlaunin eru veitt og bárust alls sex tilnefningar.

• Blogga um frétt