3.700 tonn af kolmunna til Neskaupstaðar

Beitir NK, Börkur NK og Vilhelm Þorsteinsson EA mættu til Neskaupstaðar um helgina með um það bil 3.700 tonn af kolmunna úr færeysku lögsögunni. Hafþór Eiríksson verksmiðjustjóri segir í færslu á vef Síldarvinnslunnar um að ræða ágætt hráefni.

Beitir landaði 1.000 tonnum, Börkur 1.300 tonnum og Vilhelm Þorsteinsson 1.400 tonnum, en vinnsla hófst sunnudagsmorgun.

„Það var ekki mjög mikið að hafa að þessu sinni. Holin hjá okkur gáfu frá 40 tonnum og upp í 350 tonn og það var yfirleitt lengi dregið. Veitt var bæði sunnan og vestan við Færeyjar, mest í Ræsinu vestan við eyjarnar. Þó ekki hafi verið mikill kolmunni á ferðinni þarna núna þá getur það breyst á skömmum tíma,“ segir Ólafur Gunnar Guðnason, skipstjóri á Beiti, í færslunni um gang veiða.

Bíða frétta af loðnu

„Auðvitað bíðum við frétta af nánari loðnuleit og notum tímann til að skipta um togvíra. Næst á dagskrá gæti verið loðna en eins þurfa menn að vera tilbúnir í að veiða kolmunna niður við Rockall,” er haft eftir Ólaf Gunnar.

Guðmundur J. Óskarsson, sviðsstjóri uppsjávarsviðs Hafrannsóknastofnunar, sagði þó fyrr í dag í samtali við 200 mílur að ólíklegt er að núverandi framhaldsleit Polar Ammassak og Aðalsteins Jónssonar SU að loðnu muni leiða til verulegra breytinga á stofnmati.

Frétt af mbl.is

Ekki von á að mæling leiði til breytinga

• Blogga um frétt