Grænlendingar landa þorski í Hafnarfirði

Þó nokkuð hefur borið á löndunum grænlenskra skipa í Hafnarfirði það sem af er janúar. Í höfninni í dag má sjá togarann Sisimiut landa bolfiski, en ekki hefur endanlegt magn eða aflasamsetning verið fært inn í gagnagrunn Fiskistofu.

Samkvæmt skráningu stofnunarinnar hafa grænlensk skip landað 2.725 tonnum í Hafnarfirði á tímabilinu 1. til 20. janúar, ríflega helmingur aflans er þorskur fenginn á Dohrnbanka grænlandsmegin við lögsögumörkin. Þriðjungur aflans er rækja en minna er af öðrum tegundum.

Athygli er vakin á því að nýrri löndunartölur fyrir grænlensku togarana er ekki að finna í gagnagrunni Fiskistofu en 20. janúar, en nokkra daga tekur fyrir löndunartölur að uppfærast.

Tuugaalik fyrsta skip ársins

Fyrsta grænlenska skipið sem landaði afla í Hafnarfirði á árinu var togarinn Tuugaalik GR6-10 sem landaði þar tæplega 568 tonnum 3. janúar. Þar af var mest þorskur. Sjötta janúar kom síðan Masilik GR8-350 með 246 tonn og var uppistaðan einnig mest þorskur hjá því skipi. Sama var upp á teningnum er Sisimiut GR6-18 landaði 365 tonnum í Hafnarfirði 7. janúar.

Þá var 151 tonni af rækju landað úr Nataarnaq GL166 9. janúar og 605 tonnum af bolfiski úr Polar Nanoq GR15-203 daginn eftir, mest þorski.

Markus GR6-84 kom til Hafnarfjarðar með 304 tonn af rækju 15. janúar og Polar Nattoralik GR6-49 368 tonn af rækju 20. janúar.

• Blogga um frétt