„Jú, auðvitað fylgir því ákveðinn söknuður að kveðja góðan vinnustað, trausta skipsfélaga og síðast en ekki síst atvinnugrein sem skiptir samfélagið svo miklu máli og er fyrir vikið endalaust á milli tannanna á fólki,“ segir Guðjón Guðjónsson skipstjóri, betur þekktur sem Jonni, í færslu á vef Fisk Seafood.

Jonni lauk sinni síðustu sjóferð í síðustu viku eftir rúmlega hálfa öld til sjós. Hann fékk skipstjórnarréttindi sín árið 1979 og byrjaði strax á dekkinu á Arnari HU-1. Þar tók hann svo við hlutverki stýrimanns og skipstjóra árið 1982 og gegndi því starfi í áratug. Þaðan lá leiðin í nokkur ár sem skipstjóri yfir á Örvar sem einnig var gerður út frá Skagaströnd og loks í skipstjórastólinn á frystitogaranum Arnari HU-1 árið 1996.

Í færslunni er greint frá því að Jonni hafi „gert víðreist um sjóinn en hann stæri sig af því að hafa aldrei flutt skattkortið sitt af Skagaströndinni enda hafi líf hans verið í föstum skorðum alla tíð. Undir það tekur eflaust eiginkona hans, Obba, öðru nafni Guðrún Soffía Pétursdóttir sem fær nú karlinn sinn loksins heim eftir langt úthald.“

Jonni segir vel hafa verið tekið á móti sér á bryggjunni er hann steig í land síðastliðinn miðvikudag.

„Auðvitað hlakka ég til aukinna samvista við börnin okkar Obbu og tíu afa- og ömmubörnin sem þau hafa fært okkur. Ég verð núna stoltur eldri borgari sem hefur aldrei þegið bætur af nokkru tagi frá samfélaginu og ætla að standa áfram vörð um sjálfstæði mitt í svoleiðis efnum. Svo fæ ég meiri tíma til þess að pirra mig á allri vitleysunni sem sett er fram í fjölmiðlum um sjávarútveginn. Vonandi mun vanþekkingin sem þar ræður oft ferðinni ekki hafa of mikil áhrif á ákvarðanir stjórnvalda hverju sinni.“

Þá er haft eftir Firðbirni Ásbjörnssyni, framkvæmdastjóra Fisk Seafood, að Jonna verði saknað.

„Ég samgleðst Jonna innilega með þessi tímamót og veit að hann er alveg tilbúinn til þess að koma í land. Góður skipstjóri er á vissan hátt framkvæmdastjóri um borð í hverjum túr og þar hefur Jonni verið heiðarlegur, sanngjarn og mikill leiðtogi fyrir utan auðvitað að vera þessi ósvikna aflakló sem við öll þekkjum. Jonni reyndist mér frá fyrsta degi hér hjá FISK Seafood gríðarlega traustur bakhjarl og ég kveð hann með miklum söknuði um leið og ég óska honum góðra tíma í fríinu sem framundan er,“ segir Friðbjörn.

Tengdar fréttir

Fólkið í sjávarútvegi

Feðgar saman í Grænlandstúr á jólum

• Jón stundar nýsköpun í hákarlaverkun
• Fangar sjómennskuna á filmu
• Humarveiðarnar voru skemmtilegt tímabil
• Ólst upp á Fídjí og rannsakar nú loðnu á Íslandi

» Fleiri tengdar fréttir

• Blogga um frétt