Aðgerðarsinn­inn og hvala­vin­ur­inn Paul Wat­son seg­ist vera með áætlan­ir um að trufla hval­veiðar á Íslandi í júní. Ekki er langt síðan hann olli sein­ast usla hér á landi.

„Okk­ar áfram­hald­andi her­ferð snýr að því að stöðva ólög­leg­ar hval­veiðar í sum­ar. Við mun­um trufla ís­lensk­ar hval­veiðar. Það hefst í júní,“ sagði Wat­son í sam­tali við frétta­veit­una Kyodo news á mánu­dag, að því er Jap­an Times grein­ir frá.

Wat­son, sem er 74 ára, var hand­tek­inn á Græn­landi í haust vegna hand­töku­skip­un­ar í Jap­an frá ár­inu 2012. Þar var hann sakaður um skemmd­ar­verk á hval­veiðiskipi á Suður­skaut­inu árið 2010 og fyr­ir að slasa hval­veiðimann.

Dan­ir höfnuðu þó framsals­beiðni Jap­ana og aðgerðarsinn­inn geng­ur nú laus eft­ir fimm mánaða gæslu­v­arðhald á dönsku yf­ir­ráðasvæði og virðist nú stefna á Íslands­mið á ný. Hann býr nú í Frakklandi sem heiðurs­borg­ari í Par­ís. Kveðst Wat­son hafa fengið fjölda bréfa meðan hann var í varðhaldi.

Hef­ur áður valdið usla á Íslandi

Íslend­ing­ar þekkja Wat­son vel enda hef­ur hann áður skipu­lagt aðgerðir gegn hval­veiðum á Íslandi ásamt sjálf­boðaliðum á veg­um um­hverf­is­vernd­ar­sam­tak­anna Sea Shepherd.

Árið 1986 sökktu út­send­ar­ar á veg­um sam­tak­anna til að mynda tveim­ur hval­veiðibát­um í Reykja­vík­ur­höfn með því að opna botn­lok­ur þeirra. Einnig brut­ust þeir inn í Hval­stöðina í Hval­f­irði og unnu skemmd­ir á tækj­um og búnaði þar. Sea Shepherd lýsti ábyrgðinni á hend­ur sér.

Árið 2019 kom Wat­son síðan aft­ur til lands­ins í þeim til­gangi að stöðva hrefnu­veiðar. Ekki stóð hins veg­ar til að fara á hrefnu­veiðar það árið og hafði hann því ekki er­indi sem erfiði.

Læstu sig í möstr­um

Árið 2022 stofnaði hann ný hval­vernd­ar­sam­tök sem hann nefndi í höfuð á sjálf­um sér, The Captain Paul Wat­son Foundati­on, og hafa þau einnig truflað hval­veiðar hér á landi.

Wat­son-sam­tök­in vöktu mikla at­hygli í byrj­un sept­em­ber 2023, þegar tvær kon­ur á þeirra veg­um læstu sig í möstr­um hval­veiðiskip­anna Hvals 8 og Hvals 9.

Kon­urn­ar tvær, Ana­hita Baba­ei og El­issa Biou, voru í möstr­un­um í um tvo daga. 

Fylg­ist grannt með japönsk­um skip­um

Aðeins þrjár þjóðir stunda hval­veiðar til viðskipta: Íslend­ing­ar, Norðmenn og Jap­an­ir. Wat­son seg­ir sam­tök­in fylgj­ast grannt með hval­veiðum í Jap­an.

„Ef Jap­an­ir snúa aft­ur á Suður-Íshaf í haust mun­um við vera þar til að mæta þeim,“ seg­ir hann við jap­anska miðil­inn.

Um­deilt hval­veiðileyfi

Í des­em­ber gaf Bjarni Bene­dikts­son, þá frá­far­andi for­sæt­is­ráðherra og starf­andi mat­vælaráðherra, út leyfi til veiða á 201 langreyði til Hvals hf. auk leyf­is til veiða á 217 hrefn­um til tog- og hrefnu­veiðibáts­ins Hall­dórs Sig­urðsson­ar ÍS 14 sem er í eigu Tjald­tanga ehf.

Leyfið er í gildi til fimm ára en end­ur­nýj­ast sjálf­krafa.

Ákvörðun Bjarna  var um­deild, 51% lands­manna sögðust ósátt­ir með ákvörðun­ina sam­kvæmt könn­un Maskínu. Kristrún Frosta­dótt­ir, for­sæt­is­ráðherra Íslands, hef­ur einnig sagt að lög um hval­veiðar á Íslandi séu úr­elt og krefj­ist end­ur­skoðunar.