Renault 5 snýr aftur, gervigreindur og gulur

Nokkurn veginn svona hljóma fyrstu orð forstjóra Renault-samsteypunnar, hins ítalska Luca de Meo, í litlu riti sem gefið var út í tilefni af afhjúpun nýja rafbílsins Renault 5.

Bíllinn er byggður á hinum upprunalega Renault 5, sem smíðaður var í 5,5 milljónum eintaka á árunum 1972 til 1985, og var söluhæsti bíllinn í Frakklandi þau ár. Önnur kynslóð bílsins fylgdi svo árin 1984 til 1996. Síðan hefur ekkert spurst til R5, eins og hann er einnig kallaður, fyrr en nú.

Nýtti frítímann vel

Áðurnefndur bæklingur er lagður undir skrif og teikningar forstjórans sjálfs, sem afhjúpaði bifreiðina á bílasýningunni í Genf í lok febrúar. Undir hljómaði lagið „Instant Crush“, með frönsku rafpoppsveitinni Daft Punk, sem setti tóninn fyrir hvort tveggja tilfinningar forstjórans og uppruna bílsins.

Forstjórinn lýsir þar því hvernig hann neyddist til að taka sér frí eftir að hafa tekið við forstjórastöðu Renault Group, vegna ákvæðis í fyrri samningi hans við Volkswagen-samsteypuna. Tímann nýtti hann til skrafs og ráðagerða, auk þess sem hann kveðst hafa lesið allt sem hann gat komist yfir um fyrirtækið sem nú átti eftir að heyra undir hann.

Það var svo á öðrum degi í nýju starfi sem hann lagði leið sína í tækni- og þróunarmiðstöð Renault skammt suðvestur af París, til að skoða hvað verkfræðingar og hönnuðir fyrirtækisins hefðu í burðarliðnum.

„Uppstillingin innihélt nokkra litla bíla fyrir alþjóðamarkaði og svo stóran rafbíl. En ég verð að játa að ég varð fyrir nokkrum vonbrigðum,“ greinir hann frá.

Rafhlaða Renault 5 getur gefið rafmagn til baka inn á dreifikerfið. AFP

Bara tilraunaverkefni

„Mér varð ljóst að algjörrar yfirhalningar á línunni væri þörf. Skyndilega, þar sem ég gekk um, sá ég líkan í fullri stærð af einhverju sem líktist óvænt R5. Þetta var skærappelsínugult, svo að það gat varla farið fram hjá mér. Forvitnin vaknaði og ég sneri mér að fulltrúum tæknimiðstöðvarinnar: „Hvað er þetta?““

Svarið var eftirfarandi, að sögn forstjórans: „Ó, þetta er bara tilraunaverkefni eins hönnuðar, François Leboine, og er raunar frekar æfing í stíl.“

Luca de Meo heldur áfram:

„Yfirhönnuðurinn hafði kænskulega sett bílinn þar sem hann var viss um að ég sæi hann. „Þetta var hugmynd að litlum rafbíl,“ sögðu þeir mér. „En hún var afskrifuð vegna þess að fyrirtækið vildi ekki fara í retró-hönnun.“

Ég leit á þennan hlut og virti hann fyrir mér. Þetta var algjörlega klárt, fannst mér. Ég tók ákvörðunina strax þá og þarna. „Það er nákvæmlega málið! Reynið að setja þessa hönnun á undirvagn með fjórum hjólum. Það verður að vera 100% rafbíll. Við ætlum að smíða Renault 5!““

Raunar fátt sameiginlegt

Tæpum fjórum árum síðar er bíllinn orðinn að raunveruleika og ljóst að forstjórinn er enn stórhrifinn. Hann leggur einnig áherslu á að merkið þurfi að hafa að minnsta kosti eina bifreið sem láti í ljós erfðamengi Renault, meira en nokkur önnur. Tekur hann sem dæmi Fiat 500, Volkswagen Golf, S-Class frá Mercedes Benz og svo Twingo frá Renault.

En hann horfir ekki bara til fortíðar.

„Þrátt fyrir að línurnar séu svipaðar á nýi Renault 5 í raun fátt sameiginlegt með fyrirrennara sínum. Við tókum nokkrar róttækar ákvarðanir til að gefa honum alvöru persónuleika. Á rafbílamarkaði sem Elon Musk gjörbylti með Tesla, og sem kínverskir framleiðendur eru nú að hrista upp í, er ekkert pláss fyrir bíla sem eru hvorki hitt né þetta. Þú getur ekki bara stungið rafhlöðum inn í hefðbundna yfirbyggingu.“

Fyllir upp í skarð á markaði

Þannig segir de Meo að R5 fylli skarð sem þessir nýju framleiðendur hafi vanrækt: Litla, ódýra borgarbíla.

„R5-undirvagninn var hannaður einungis fyrir rafdrifið kerfi. Ég átti langar samræður um þetta við verkfræðinga Renault. Sumir þeirra vörðu hugmyndina um tvinnbíla sem einnig hefðu eldsneytisvél. En á endanum, þá gefur þessi hönnun okkur mikið forskot. Við erum þau fyrstu í Evrópu til að taka þessa ákvörðun. Það gefur okkur að minnsta kosti tvö ár fram yfir keppinautana.“

Ný tækni fylgir bílnum og vakti nokkra athygli á sýningunni. Hann er til að mynda sá fyrsti sem getur gefið rafmagn aftur inn á dreifikerfið, vilji eigandinn það. Þannig má hlaða hann á þeim tímum dags þegar rafmagnið er ódýrt og selja það svo aftur inn á kerfið þegar þess er meiri þörf.

„Þessi tækni kostar framleiðandann, en er frábær fyrir neytendur. Kannanir okkar gefa til kynna að þeir muni geta sparað allt að 50% af rafmagnsreikningnum,“ segir forstjórinn.

Gervigreind um borð

Annar eiginleiki fylgir bílnum, sem tíminn á eftir að reyna, en það er gervigreind sem er persónugerð sem snjallmennið Reno. Minnir lítillega á gamla góða Clippy frá Microsoft en virðist þó öllu meira viti borið. Er það knúið af tækni ChatGPT en sérsniðið að bílnum og þörfum ökumanns.

Gefum de Meo orðið: „Eins og Tamagotchi, þá mun það lifa og læra. Þetta gerir bílinn mannlegri.“

Loks er mikið lagt upp úr því að bíllinn sé framleiddur í Frakklandi.

„Frá efnahagslegu sjónarmiði, þá væri mun auðveldara að smíða nýja Renault 5 annars staðar, í lággjaldalöndum. Margir samstarfsmenn mínir hvöttu mig til þess. Enn og aftur, þá hlustaði ég á hugmyndir allra, en hélt mínu striki. Og tók mína ákvörðun.

Þessi bíll hefur það markmið að endurtengja Renault við Frakkland. Að setja í baksýnisspegilinn hugmyndir um afiðnvæðingu og landflutninga, sem tengdar voru vörumerkinu fyrir aðeins þremur árum. Mín hugsun er reist á staðfastri trú: Að þegar þú kaupir bíl, þá kaupirðu hlut í iðnmenningu viðkomandi lands. Ef við skerum rætur bílsins af með því að smíða hann annars staðar, þá glatar hann sál sinni.“