Humvee hættir herþjónustu
Setja bókamerki
Eftir þrjátíu ára notkun ætlar Bandaríkjaher að hætta að nota Humvee-bíla, að minnsta kosti á átakasvæðum.
Humvee er skammstöfun og stendur fyrir High-Mobility Multi-Purpose Wheeled Vehcile, sem á íslensku gæti verið kallað fjölhreyfanlegt margnota farartæki á hjólum.
Sögu hans má rekja til 1979, þegar Bandaríkjaher auglýsti samkeppni um hönnun slíks farartækis. Það átti að vera með góða aksturseiginleika, bæði á vegum og vegleysum, hafa mikla burðargetu og aukna vörn gegn óbeinum skotárásum.
Alls tók 61 fyrirtæki þátt í samkeppninni, en aðeins þrjú skiluðu inn frumgerðum. Það var svo AM-General sem fékk samninginn og fyrsti Humvee-inn leit dagsins ljós 1984.
Humvee er, í raun, arftaki hins upprunalega Jeep-jeppa, sem hafði þjónað Bandaríkjaher frá 1940, enda oft kallaður Jeep á sterum.
Notagildi Humvee var þó töluvert meira og auðvelt að breyta bílnum eftir þörfum hverju sinni.
Humvee var fyrst notaður í stríði í Panama árið 1989 og í kjölfarið í Kúveit og Írak árið 1991. Eftir að hafa verið tíður gestur á sjónvarpsskjáum um allan heim vaknaði mikill áhugi á útgáfu fyrir hinn almenna borgara, og Hummerinn var fæddur.
Þá hafa aðrar þjóðir sýnt herbílnum mikinn áhuga, og alls eru um áttatíu þjóðir með Humvee-bíla í sinni þjónustu, þar á meðal Danmörk og Noregur.
Þar sem Humvee var aldrei hannaður til að vera brynvarinn hefur breyttur hernaður, til dæmis í Írak og Afganistan, kallað á miklar breytingar á bílunum, þar sem brynvörn er komið fyrir eftirá.
Því fylgir mikil þyngdaraukning, sem hefur valdið vandræðum þar sem slitfletir, drifrás og burðarvirki bílsins er allt hannað fyrir minni þyngd.
Á næsta ári mun Bandaríkjaher byrja að minnka notkun Humvee-bíla á átakasvæðum, og nota í staðinn JLTV-bíla. Þeir fara í framleiðslu 2015 og hafa margt til brunns að bera. Eru til dæmis brynvarðir, hafa enn meira burðarþol en Humvee og allt að sex sæti, eftir útgáfum.
