Hekla hóf árið með hvelli

Árleg stórsýning bílaumboðsins Heklu dró til sín fjölda fólks, en hún var  haldin síðastliðinn laugardag með pompi og prakt. Í þetta sinn undir rafmögnuðum formerkjum en frum- og forsýningar dagsins einkenndust af vistvænum áherslum.

Audi frumsýndi rafmagnaðan Audi e-tron 50, velútbúinn sportjeppa með allt að 336 km. drægi. Smábíllinn Audi A1 var einnig frumsýndur þennan dag.

Hjá Volkswagen var snaggaralegi rafbíllinn e-up! frumsýndur en hann dregur allt að 260 kílómetra. Að auki kynnti Volkswagen nýja línu T6.1 atvinnubíla sem slegið hafa í gegn um allan heim.

Skoda frumsýndi nýjan Superb sem var að koma til landsins en hann gefur forsmekkinn af fyrsta tengiltvinnbílnum frá Skoda; Superb iV, en hann er nú þegar kominn í forsölu í sýningarsal Heklu á netinu.

„Fjöldi gesta lagði leið sína á Laugaveginn og kynnti sér fjölbreyttan farkost, hleðslumöguleika frá raforkufyrirtækjunum ON og Ísorku og gæddu sér á veitingum. Það var mikil ásókn í reynsluakstur og dagurinn heppnaðist með eindæmum vel,“ segir í tilkynningu.

„Við erum ótrúlega þakklát öllum þeim sem sáu sér fært að koma til okkar á laugardaginn og skoða úrvalið okkar og nýjungar. Ánægjulegt var að finna gríðarlegan áhuga fólks á mismunandi aflgjöfum og vistvænum nýjungum. Það gefur okkur byr undir báða vængi þar sem við hjá Heklu hyggjumst halda áfram að bjóða breitt úrval bíla með fókus á raforkuna. Meðal þess sem er framundan er áframhaldandi kynning og sala á nýju ID. rafbílalínunni frá Volkswagen og Audi e-tron sportjeppunum. Jafnframt er fjölgun í vistvænum kostum frá Skoda framundan og á ég þá helst við tengiltvinnbílinn Skoda Superb iV og alrafmagnaða smábílinn CITIGOe iV sem við eigum von á í haust. Ekki má gleyma vinsælasta tengiltvinnbíl síðustu missera, Mitsubishi Outlander PHEV sem heldur áfram að gera góða hluti. Það eru spennandi tímar framundan og árið leggst vel í okkur,“ segir Hjördís María Ólafsdóttir vörumerkjastjóri hjá Heklu í tilkynningunni.