Twingo sem rafbíll

Renault ætlaði að frumsýna nýjan örlítinn rafbíl á bílasýningunni í Genf í þessari viku. Hætt hefur verið við sýninguna vegna kórónuveirunnar og bíllinn því kynntur rafrænt.

Hér erum að ræða Renault Twingo í rafútgáfu, en þessi vinsæli smábíll hefur selst í fjórum milljónum eintaka í 25 löndum frá því hann kom fyrst á götuna, árið 1992.

Að sögn Renault hefur Twingo verið söluhæsti bíllinn í A-stærðarflokki um árabil og einn fjögurra söluhæstu smábíla í Evrópu. Kynslóðir  hans eru orðnar þrjár.

Það er í takt við tímann að bjóða Twingo sem rafbíl en við það bætist Z.E. við heiti hans.  Renault hefur tekist að koma fyrir í honum rafgeymi upp á 22 kílóvattstundir en með honum verður drægi bílsins 250 kílómetrar  samkvæmt WLTP-city mælingum og 180 km í blönduðum akstri.

Með 22 kílóvatta hraðhlöðu má á hálftíma bæta á geyminn straumi til 80 kílómetra aksturs.