Opna safn með bílum njósnarans

Nú geta bílaáhugafólk og unnendur kvikmyndanna um njósnara hennar hátignar, James Bond, skemmt sér saman á sérstöku safni um bíla þessa frægasta spæjara kvikmyndasögunnar.

Fyrsta myndin um Bond, Dr. No, kom út árið 1962 og verða því sextíu ár liðin á næsta ári frá því að Sean heitinn Connery birtist fyrst á hvíta tjaldinu í hlutverki 007.

Ekki bara Aston Martin

Safnið er það fyrsta sinnar tegundar í heiminum og þar verður hægt að finna brot af því besta úr bílasafni Bonds.

Aston Martin verður þar án efa í aðalhlutverki en Bond hefur í gegnum árin einnig sest undir stýri á Toyota, Bentley, Rolls Royce, Lotus, Ford Mustang og BMW svo eitthvað sé nefnt.

Safnið opnaði á laugardag og verður opið þar til í október á næsta ári hið minnsta, í sýningarsal Petersen-bílasafnsins í Los Angeles í Kaliforníu.