Brugðu á leik með nýjan Mini Countryman á Íslandi

Erlendir blaðamenn heimsóttu Ísland á dögunum til að kynnast nýjum Mini Countryman og var tækifærið notað til að mynda bílinn í íslenskri náttúru. Samhliða því efndi BL til viðburðar fyrir boðsgesti á Nauthóli þar sem bifreiðin var frumsýnd.

Mini Countryman er stærsta útgáfa Mini til þessa og sú fyrsta sinnar tegundar sem framleidd er í Þýskalandi; nánar tiltekið í verksmiðju BMW í Leipzig. Þykir Mini Countryman rúmgóður, þægilegur, og hlaðinn tækninýjungum og eins hefur verið leitast við að lágmarka umhverfisáhrifin af framleiðslu bílanna s.s. með því að nota endurnýtt ál í felgurnar og endurunnið plast í innréttinguna.

Umsagnir blaðamanna að reynsluakstri loknum benda til að Mini Countryman hafi staðið sig vel við íslenskar aðstæður, og lét bifreiðin hvorki snjó né hálku stöðva sig, en um var að ræða svokallaða S All4 útgáfu sem er með drif á öllum hjólum og skartar sportlegum John Cooper Works útlitspakka.