Endalaus uppspretta afþreyingar

„Ég starfaði fyrst sem veitingastjóri og tók við sem hótelstjóri fyrir rúmu ári.“ Hótelið er núna rúmlega 100 herbergi en yfir standa mikla framkvæmdir og bætast við 25 herbergi í byrjun sumars. Aðspurð hvort hótelið hafi breytt einhverju fyrir svæðið segir Harpa svo vera þar sem þetta sé eitt vinsælasta ferðamannasvæðið á landinu. „Svona hótel bætir í viðskipti annarra á svæðinu, sérstaklega afþreyingarfyrirtækjanna, heiðarleg samkeppni er alltaf af hinu góða.“

Hvað er hægt að gera í nágrenninu?

„Þetta er nánast endalaus uppspretta af afþreyingu, hér er hægt að fara í bátsferðir bæði á Jökulsárlóni og Fjallsárlóni, íshellaferðir, jöklagöngur, útsýnisflug frá Freysnesi, lundaskoðun í Ingólfshöfða, fyrir utan merktar gönguleiðir eins og að Svartafossi og um Skaftafell. Flest fyrirtækin eru með íshellaferðir á veturna og jöklagöngur á sumrin þar sem íshellarnir eru ekki öruggir á sumrin. Svo er safn á Hala og hér í sveitinni hefur verið starfrækt hestaleiga, það er síðan mikið líf áfram þegar keyrt er austur að Höfn, margar fallegar gönguleiðir t.d. Svo er töluvert af staðvinnslu á hráefni, jöklaís og Skaftafell delicatessen til dæmis.“

Sonur Hörpu kjarnar sig við rætur Vatnajökuls. Ljósmynd/Aðsend

Hvað finnst þér skemmtilegast að gera á svæðinu?

„Mér finnst Svínafellsjökull æði, ég upplifi einhvers konar núllstillingu við að labba í nágrenni við hann. Eins höfum við verið aðeins með hesta og þetta er frábært svæði til útreiða.“

Harpa býr í nágrenni við hótelið ásamt eiginmanni, sem vinnur á hótelinu, og tveimur sonum sem eru í grunnskóla á svæðinu en sá elsti býr á Selfossi sþar em hann sækir skóla. „Það er alveg frábært hér í Öræfunum, hér er mikil samheldni og margt skemmtilegt fólk. Frábært svæði til útivistar og klárlega algjör sveitasæla.“ 

• Blogga um frétt