Ferðalög | mbl | 22.5.2019 | 11:30

Vinsælustu upplifanirnar á Íslandi

Hestabóndinn Hörður er með vinsælustu upplifunina á bókunarsíðunni Airbnb. Ljósmynd/Annelise

Ferðavefurinn rýndi í þær upplifanir sem virðast vera þær vinsælustu samkvæmt stjörnugjöf og ummælum.

Reiðtúr og hádegismatur með bóndanum

Í Mosfellsbæ býr Hörður hestabóndi sem býður upp á morgunkaffi, reiðtúr og léttan hádegismat úr hráefni sem flest er framleitt í næsta nágrenni. Meira en 160 manns gáfu þessari upplifun fimm stjörnur.

Erlendir ferðamenn hafa lengi vel verið hrifnir af íslenska hestinum. Ljósmynd/Annelise

Dagsferð um Reykavík og Bláa lónið

Jarðfræðingurinn Helga Bára elskar að taka á móti erlendum gestum og sýna þeim hvað höfuðborgarsvæðið hefur upp á að bjóða. Að lokinni skoðunarferð um Reykjavík er slakað á í Bláa lóninu.

Falleg fjölskyldustund í Bláa lóninu. Ljósmynd/Jaclyn

Smakkað á því besta í borginni

Susi er upprunalega frá Perú en hefur búið á Íslandi í tæp 15 ár. Hún býður ferðamönnum upp á þriggja klukkustunda matarferð um borgina þar sem smakkað er á kjötsúpu, hákarli, pylsum, hval og skyri, hvað er hægt að biðja um meira?

Bæjarins bestu pylsurnar eru sívinsælar hjá ferðamönnum sem og heimafólki. Ljósmynd/Andrew

Æsispennandi yfirborðsköfun

Köfun í Silfru er sívinsæl og ekki að undra því það er ekki hvar sem er í heiminum sem hægt er að kafa á milli tveggja heimsálfa. Upplifunin er sögð einstök en á sama tíma ísköld.