Ferðalög | mbl | 14.7.2019 | 10:30 | Uppfært 13:39

Umhverfið eins og gott slökunarforrit

Í tjöldunum eru uppábúin rúm, hiti og rafmagn. Ljósmynd/Úr einkasafni

„Við ákváðum að slá til nú í sumar og bjóða upp á lúxustjaldgistingu á Vaði í Þingeyjarsveit í samstarfi við Camp Boutique sem er einnig með lúxustjaldgistingu í Gaulverjarbæjarhreppi. Þessi gistimöguleiki passaði vel inn í þá hugmynd sem við höfðum um að bjóða gestum okkar að upplifa friðsæld í fallegu umhverfi. Fyrirtækið okkar, Original North, býður einnig upp á gistingu í gömlum nýuppgerðu húsi á staðnum. Ásamt því að bjóða upp á gistingu höfum við í bígerð að bjóða upp á afþreyingarmöguleika eins og hjóla- og gönguferðir, þar sem náttúran býður upp á ýmsa skemmtilega möguleika,“ segja Sigrún og Birkir.

Sigrún og Birkir segja móttökurnar hafa farið fram úr björtustu vonum. Ljósmynd/Úr einkasafni

Hjónin opnuðu dyrnar fyrir gestum og gangandi þann 15. júní og segja þau viðtökur hafa verið framar vonum og það hafi ekki síst komið þeim á óvart hvað íslendingar hafi sýnt þessu mikinn áhuga. Aðspurð hvað sé ólíkt með að gista í venjulegu tjaldi og lúxustjaldgistingu segja þau það síðarnefnda ekki ólíkt því að gista á hóteli.

„Í tjöldunum eru uppábúin rúm, húsgögn, hiti og rafmagn. Það sem gerir þennan gistimöguleika einstakan er hvað þú ert í miklum tengslum við náttúruna. Þú sofnar við fuglasöng og niðinn í fljótinu. Nokkrir af gestum mínum sem koma frá stórborgum hafa haft að orði að hér hljómi umhverfið eins og gott slökunarforrit.“

Nokkrir af gestum mínum sem koma frá stórborgum hafa haft að orði að hér hljómi umhverfið eins og gott slökunarforrit. LJósmynd/Úr einkasafni

Sigrún og Birkir segjast afar heppin með staðsetningu því margt sé hægt að gera í umhverfinu. Meðal annars sé hin víðfræga Norðurstrandaleið í næsta nágrenni en hún var nýlega valin á topp 10 lista yfir þá áfangastaði í Evrópu sem best er að heimsækja að mati Lonely Planet, sem er einn vinsælasti útgefandi ferðahandbóka í heiminum.

Frétt af mbl.is

Grasrótarverkefnið varð að einum besta áfangastað í Evrópu

„Demantshringurinn er einnig rétt hjá en sú leið liggur í gegnum Húsavík framhjá Ásbyrgi og Hljóðaklettum, upp að Dettifossi, að Mývatni. Það er því nóg að sjá á þessu svæði enda eru dæmi þess að fólk gisti í viku í tjöldunum hjá okkur til að skoða sig um,“ segir Sigrún.

Ísland Norðurland