Himinninn í Mývatnssveit heillaði Grétar sem barn

Grétar Jónsson, framkvæmdastjóri og einn af eigendum norðurljósasetursins Aurora Reykjavík, heillaðist snemma af fegurð himingeimsins. Grétar veitt fátt betra en að vera úti í náttúrunni í myrkri en þá skapast kjöraðstæður til að mynda norðurljósin. Í myrkrinu þarf að treysta á önnur skilningarvit en sjónina. 

„Ég hef frá barnæsku alltaf verið hrifinn af himingeiminum og man mjög vel eftir því sem barn að hafa legið úti á kvöldin í Mývatnssveit þar sem ég bjó og starað á norðurljósin og stjörnunnar. Ég var alltaf að lesa vísinda- og náttúrufræðibækur öll uppvaxtarár mín og ég ætlaði að verða jarðfræðingur,“ segir Grétar um áhuga sinn á stjörnum og norðurljósum. 

Svo fór þó að Grétar menntaði sig í viðskiptafræði með áherslu á fjarmál og alþjóðaviðskipti. Áhuginn á norðurljósum var hins vegar alltaf til staðar og þegar hann hitti Hörð Finnbogason fyrir tilviljun á Akureyri árið 2012 sá Grétar fram á að sameina áhugamál sín, viðskipti og norðurljós.  

„Við höfðum ekki hist lengi og vorum að segja hvor öðrum frá því hvað við vorum að gera. Ég var á þessum tíma að leita að einhverju góðu viðskiptatækifæri og hann var með þessa hugmynd í kollinum. Fyrir mér var þetta upplagt tækifæri, getað sameinað áhugamál og vinnu. Það er síðan nokkrum mánuðum síðar að ég rekst á auglýsingu um þetta húsnæði á Grandanum til leigu. Ég hef samband við Hörð og við slógum til og settum allt af stað.“

Hvað er það við norðurljósin sem heilla þig? 

„Ég hef alltaf verið mikið fyrir útivist og líður alltaf best á fjöllum. Það hefur líka alltaf heillað mig að vera úti í myrkrinu þar sem það gefur allt annað yfirbragð á náttúruna. Augun byrja að venjast myrkrinu en það þarf líka að treysta á önnur skilningarvit svo sem heyrn til að fara um. Þegar það byrjaði að verða gerlegt að mynda norðurljósin þá fór þetta einstaklega vel saman, að mynda einhvers staðar úti í náttúrunni og kyrrðinni. Það er algjörlega ólýsanleg tilfinning að vera þarna úti og heyra bara nið frá fossi eða vera nálægt jökli og heyra brestina frá honum. Svo þegar allt lýsist upp við norðurljósin og enn þá betra ef það er tunglsljós líka, þá sést allt umhverfið líka og myndirnar verða einstaklega fallegar.“ 

Grétar segir gott að skoða norðurljós á Íslandi. Ljósmynd/Aðsend

Hefur þú skoðað norðurljós annars staðar í heiminum?

„Já ég hef farið til Grænlands og Svalbarða til að sjá norðurljósin, einnig hef ég farið í syðsta þorp í heimi til að sjá suðurljósin. Ísland er mjög hentugt land til norðurljósaskoðunar, við höfum mjög gott vegakerfi sem gerir það að verkum að það er með auðveldum hætti hægt að fara á þá staði sem eru líklegir til að hafa heiðskíran himin og hægt að velja um mjög fjölbreytt landslag til að hafa í bakgrunni fyrir myndatökur. Bæði á Grænlandi og Svalbarða eru nánast engar vegasamgöngur utan byggða, ef það þarf að færa sig til vegna skýja, þá er það nánast ekki hægt. Eins ef þig langar að hafa nýjan bakgrunn í myndatöku þá er ekki um svo mikið að velja. Þegar ég fór til Chile til að fanga suðurljósin, kom það svolítið á óvart að engin af heimamönnum sem ég hitti hafði séð þau eða heyrt um þau. Við fórum þó út þar að nóttu til, við sáum engin ljós en ljósin komu örlítið fram á myndavélunum okkar.

Það er svo planið að fara til Finnlands í haust og jafnvel Alaska líka. Það er alltaf gott að sjá hvernig aðrir eru að sinna ferðamönnunum og fá einhverjar hugmyndir.“

Ertu mikill ævintýramaður almennt?

„Já, ég hef mjög gaman að því að ferðast bæði innanlands og erlendis. Ég fer mikið í gönguferðir, allt frá því að ganga hringinn í kringum Elliðavatn upp í tíu daga fjallgöngur í Ölpunum. Ég reyni líka að fara á snjóbrettið mitt reglulega bæði hér heima og erlendis. Einnig finnst mér gaman að fara gamla slóða á fjallahjólinu mínu. Eins finnst mér mjög gaman að keyra um hálendi Íslands hvort sem er að sumri eða vetri til.“

Grétar situr ekki auðum höndum þrátt fyrir að ferðatakmarkanir hafi sett strik í reikninginn hjá fyrirtækinu eins og hjá mörgum öðrum fyrirtækjum í ferðamannageiranum. 

„Núna er loksins hægt að fara að huga að öllu myndefninu sem við höfum verið að taka síðastliðin ár. Einnig erum við að nýta tímann i kærkomið viðhald á safninu, mála, betrumbæta og bæta við. Við höfum líka verið að vinna að verkefni með BBC, heimildamynd um norðurljósaunnendur víðs vegar um heiminn.“

• Blogga um frétt