Almannatengillinn Grétar Theódórsson er mikill skíðagarpur og veit fátt betra en að fá sér einn ískaldann bjór eftir að hafa rennt sér niður skíðabrekkurnar. Honum finnst best að vera á Siglufirði um páskana en þar eiga þau hjónin Grétar og Sóley hús og nýta hvert frí til að fara þangað. 

Hann hefur þó ferðast víða yfir páskahátíðina og meðal annars eytt páskunum í Bandaríkjunum, Austurríki, Ástralíu, Svíþjóð og Hollandi. Langbest segir hann þó að vera á Siglufirði um páska.

Hvað ætl­ar þú að gera um pásk­ana?

„Við fjölskyldan erum svo heppin að vera með hús á Siglufirði og förum alltaf norður í  dymbilvikunni og erum fram yfir páska. Um páskana er síðan mjög skemmtilegur hópur vina okkar í bænum og það er mikil tilhlökkun fyrir þessu prógrammi hjá okkur. Svona ef fjórða bylgjan setur ekki strik í reikninginn!“

Um páskana 2019 á Siglufirði. Ljósmynd/Aðsend

Sérðu fram á að stunda úti­vist um páskana?

„Ég sé fyrir mér að skíða eins mikið og ég mögulega get, en ég veit ekkert skemmtilegra en að skíða á Sigló með Sóleyju konunni minni og stelpunum okkar tveimur, Iðunni og Sögu. Svo er bjórinn aldrei betri en eftir góðan dag í fjallinu.“

Hef­ur þú ferðast er­lend­is um pásk­ana?

„Það er orðið ansi langt síðan ég hef ferðast erlendis um páska en ég hef eytt páskum í Bandaríkjunum, Austurríki, Ástralíu, Sviþjóð og Hollandi. Man satt best að segja ekkert sérstaklega eftir páskum í þessum löndum enda er langbest að vera á Sigló um páskana.“

Grétar og Sóley með dætur sínar um páskana 2016. Ljósmynd/Aðsend

En inn­an­lands?

„Ég var nokkrum sinnum fyrir vestan um páskana, á Bolungarvík og Ísafirði, þegar ég var yngri, en undanfarin ár hef ég alltaf verið á Sigló.“

Hvernig voru pásk­arn­ir í fyrra? Ferðaðist þú bara inn­an­dyra eins og þríeykið hvatti til?

„Það var mesti skellurinn í öllu Covid-bíóinu í fyrra að komast ekki til Sigló um páskana. Ég varð fertugur á pálmasunnudag, sama dag og 105 smit greindust, sem var aðeins öðruvísi en ég hafði séð fertugsafmælið fyrir mér. Þrátt fyrir allt áttum við nú bara nokkuð ljúfa páska.“

Sérðu fyrir þér að skella þér utan um páskana 2022?

„Nei, ég sé fyrir mér að vera á Sigló um páskana 2022 enda vil ég hvergi annars staðar vera um páska.“

Grétar er mikill skíðagarpur og fer reglulega með dætur sínar á skíði. Ljósmynd/Aðsend

Fjölskyldan við Seljalandsfoss. Ljósmynd/Aðsend

Tengdar fréttir

Ferðumst innanlands

Ragnhildur Steinunn og fjölskylda í náttúruparadís

• Hvar er besta veðrið fyrir tjaldútilegu helgarinnar?
• Upplifði menningarsjokk á Íslandi
• Hvar er besta veðrið fyrir tjaldútilegu helgarinnar?
• Hvar verður bongó fyrstu helgina í júlí?

» Fleiri tengdar fréttir

• Blogga um frétt