Hitabeltislægðin Hermine gekk yfir Kanaríeyjar í gær og olli talsverðri eyðileggingu. Fjölda flugferða var aflýst í gær, sunnudag, af þeim sökum en veðurviðvaranir falla flestar úr gildi um miðjan dag í dag.

Hermine var upphaflega skilgreind sem hitabeltisstormur en talsvert hafði dregið úr veðurofsanum þegar hún fór yfir Kanaríeyjar og var hún því skilgreind sem hitabeltislægð. 

Mikið vatn safnaðist fyrir á götum og flæddi inn í kjallara. Tré brotnuðu og rifnuðu upp með rótum víða, en Gran Canaria fór hvað verst út úr óveðrinu. Rafmagn fór af á sumum stöðum og voru 1.800 manns án rafmagns í gær að því er fram kemur í umfjöllun Canarian Weekly. Tilkynnt hafði verið um aurskriður á 30 stöðum í morgun.

Alls var 215 flugferðum til og frá Kanaríeyjum aflýst í gær. 

Búist er við að einhverjar tafir verði á flugi til og frá eyjunum í dag en aðeins vegna þess að verið er að vinda ofan af aflýstum flugferðum frá því í gær. 

Tengdar fréttir

Tenerife

Eva Ruza tryllti lýðinn á Tenerife

• Birgitta Líf flúði gulu viðvörunina til Tenerife
• „Mínar uppáhaldsminningar eru eyjahoppin í Tælandi“
• Mari farin í verðskuldað frí til Tenerife
• Mari bauð forsetanum til Tenerife

» Fleiri tengdar fréttir

• Blogga um frétt