Einstakt sjónarspil við sólarlag

Í fáeinar mínútur í senn, nokkrar vikur á hverju ári, virðist sem eldur logi í Horstail-fossi í Yosemite-þjóðgarðinum í Kaliforníu. Rétt áður en sólin sest skín hún í hinsta sinn á fossinn sem lýsist upp og virðist gerður úr rennandi hrauni. 

Sjónarspilið er einstakt og dregur fjölda ferðamanna að á hverju ári. Nú um þessar mundir er þessi einstaki tími árs. 

Töfrandi stund

„Þegar sólin sest frá nákvæmlega þessu sjónvarhorni, þá lýsir hún upp El Capitan. Þetta er blanda af endurskini sólarinnar á vatninu, heiðskírum himni og rennandi vatni. Ef þetta allt kemur saman, þá er þetta töfrandi stund,“ sagði Scott Gediman þjóðgarðsvörður í Yosemite. 

Miklir þurrkar hafa geisað í Kaliforníu undanfarin ár. Hefur það tekið sinn toll af fljótum og ám í ríkinu. Eftir mikið rigningaveður í upphafi árs er ástandið í ríkinu mun betra, og mikið vatn í ám.