Skóhönnuður opnar hótel í Portúgal

Christian Louboutin er þekktastur fyrir glæsilega skó með rauða sóla. Nú hefur hann hannað hótel í Portúgal.

Hótelið er staðsett í Melides við Alentejo ströndina og er í 75 mínútna akstursfjarlægð frá Lissabon. 

Hótelið er hið glæsilegasta og franski sjarminn svífur yfir vötnum enda er Louboutin franskur að uppruna. Hann á þó heimili einnig í Brasilíu og Egyptalandi og bera húsgögn hótelsins þess glöggt merki. Hótelið heitir Vermehlo sem þýðir rautt og vísar til rauðu sólanna.

„Þetta hótel gerir mér kleift að tæma geymslur mínar sem eru fullar af forngripum sem ég hef sankað að mér í gegnum árin. Þá er þetta líka tækifæri til þess að sýna fólki verk listamanna sem ég dáist að,“ segir Louboutin í viðtali við Sphere.

Nóttin þarna er þó ekki ókeypis en í sumar kostar hún frá 200 þúsund krónum. Það gæti því verið sniðugt fyrir þá sem eru að spara að gista annars staðar en borða kvöldmat á veitingastað hótelsins Xtian og upplifa stemminguna.