Ferðalög | Ferðalög erlendis | AFP | 26.7.2023 | 20:00

Ferðaðist til allra landa í heiminum án þess að fara í flugvél

Torbjørn Pedersen er kominn aftur heim eftir tíu ára ferðalag um heiminn. AFP/James Brooks

Daninn Torbjørn Pedersen er kominn aftur til Danmerkur eftir tíu ára ferðalag um heiminn. Segist hann vera fyrstur til þess að heimsækja hvert land í heiminum í einni ferð án þess að fljúga. Lagði hann af stað í október 2013 og ferðaðist um heiminn með lestum, bátum, bílum og jafnvel fótgangandi.

Síðasta landið var Maldíveyjar, sem hann heimsótti í maí síðastliðnum, en hann steig á land í Árósum í vikunni eftir að hafa fengið far með gámaskipi. Í viðtali við AFP lýsti Pedersen endurkomunni sem ljúfsárri þar sem hann hafi dreymt lengi um að komast heim en á sama tíma kvíðir hann framtíðinni.

Tók lengri tíma en áætlað var

Innblásturinn að ferðalaginu kom frá grein sem faðir Pedersen sendi á hann. Í upphafi reiknaði hann með því að ferðalagið tæki að hámarki fjögur ár. Á endanum tók það hins vegar tíu ár fyrir hann að komast út um allan heim án þess að stíga upp í flugvél.

Kórónuveirufaraldurinn hafði sitt að segja en Pedersen var fastur í Hong Kong í tvö ár, eftir að hafa farið þangað frá Míkrónesíu árið 2020. Eftir að landamæri Hong Kong voru opnuð á ný hélt hann ferð sinni áfram í gegnum Eyjaálfu.

Gifti sig á meðan ferðalaginu stóð

Þrátt fyrir landfræðilega fjarlægð hefur Pedersen náð að halda sambandi sínu við konu sína gangandi. Ferðaðist hún 27 sinnum til hans á þeim tíu árum sem ferðalagið tók og í tíundu ferð hennar bað hann hennar. Vegna kórónuveirufaraldursins neyddust þau hins vegar til að gifta sig í netheimum. Segir hún að hún hafi dáðst að hugrekki og þrjósku hans en hlakki til að fá hann aftur heim og lifa hefðbundnu lífi með honum.