Samfélagsmiðlastjarnan Arnar Gauti Arnarsson, betur þekktur sem Lil Curly, ætlar að ferðast vítt og breitt um landið í sumar. Hann ætlar meðal annars að koma við á Austurlandi þar sem Seyðisfjörður stendur upp úr að hans mati. Hann kann vel við sig í skemmtilegri útilegu en enn betur á góðu hóteli með almennilegri þjónustu.

Ætlar þú að ferðast innanlands í sumar?

„Já! Ég ætla fara á Egilsstaði og Seyðisfjörð.“

Áttu þér uppáhaldsstað á Austfjörðum?

„Seyðisfjörður hefur mikla yfirburði fyrir austan.“

Áttu þér uppáhaldssundlaug úti á landi?

„Sundlaugin á Suðureyri er falinn gullmoli, Hofsós á svaðalega sundlaug ef þú ert að leita að útsýni.“

Hvað finnst þér best að grilla í útilegunni?

„Hamborgarar á grillið klikka seint eða aldrei.“

Áttu uppáhaldstjaldsvæði?

„Tunguskógur á Ísafirði er ótrúlega skemmtilegt tjaldsvæði, síðan eru góð tjaldsvæði á Mývatni sem fá „shout out“.“

Er einhver staður á landinu sem þú hefur enn ekki komið á en langar að fara á?

„Já, mig langar að fara í vélsleðaferð upp á Vatnajökul.“

Tjald eða hótel?

„Það er geðveik stemning í tjaldi en ég verð að velja hótel vegna þess ég elska þegar það er tekið til eftir mig.“

Hvaða flík verður að fara með í útileguna?

„Þú ferð ekki í útilegu á Íslandi án þess að taka síðbrækur með þér.“

Hvað ætlarðu að gera annað skemmtilegt í sumar?

„Fara á Ísafjörð og kíkja á Tjöruhúsið.“