Stundum liggja allar leiðir til Svíþjóðar. Ef þú vissir ekki að þig langaði að heimsækja landið og gista við Immeln-vatn á Skáni þá gætir þú skipt um skoðun. Þar er að finna nýtískulegt arkitektaundur sem kallast Vipp Shelter sem er í eigu danska hönnunarfyrirtækisins Vipp. Íslendingar þekkja ruslafötur þeirra og smáhluti sem prýða heimilið en nú er hægt að fá hönnunina beint í æð með því að gista í þessu ævintýrahúsi. 

Kasper Egelund, forstjóri, danska hönnunarfyrirtækisins Vipp fékk hugljómun þegar hann bjó með fjölskyldu sinni í New York á árunum 2008-10. Þar fékk hann hugmynd að afslöppunarstöðum þar sem fólk gæti náð streitunni úr frumunum þar sem hönnun og náttúra tengdust á heillandi hátt. Þetta þyrfti að vera staður þar sem ekkert truflaði augað og kyrrð og ró væri allsráðandi. 

Í dag rekur Vipp sjö gistirými þar sem fegurð og hönnun sameinast. Vipp Shelter er eitt af þeim en það var hannað af arkitektastofunni Argency 2014 og við Immeln-vatn í Svíþjóð. Hönnun Vipp er áberandi í húsinu en þar er að vinna svart Vipp eldhús og alla þá lampa, hillur og húsmuni sem fyrirtækið framleiðir. Veggir eru málaðir í dökkum litum og er ekkert sem stingur í stúf. 

Húsið er byggt úr stáli en meginuppistaðan í Vipp Shelter er stálgrind með rennandi gluggarömmum sem ná frá gólfi til lofts. Það gerir það að verkum að gestir hússins upplifa óhindrað útsýni yfir Immeln-vatnið og skóginn í kring. Efnisvalið er í takt við Vipp sem hefur framleitt hluti úr stáli síðan 1939. Húsið er hannað fyrir tvær manneskjur og er svefnherbergið á efri hæðinni. Það sem gerir það sérstakt eru loftgluggar. Fólk getur því liðið eins og það sé með himinhvolfin í fanginu og sameinist náttúrunni á dýpri hátt en áður. Hver og einn verður að dæma fyrir sig en eitt er víst að fólk sem splæst hefur í Vipp-ruslafötur myndi líklega ekki fúlsa við einni nótt við vatnið.