Ísland virtist vera vinsæll áfangastaður meðal fræga og ríka fólksins árið 2023. Chris Hemsworth, Travis Scott, Emmanuel Macron og Fernando Torres voru meðal þeirra stjarna sem heimsóttu Ísland á árinu.

Chris Hemsworth

Stórleikarinn Chris Hemsworth kom til landsins ásamt dóttur sinni Indiu Rose í október. Feðginin áttu ævintýralega daga á klakanum og fóru meðal annars í laxveiði, hestaferð, klifur og fjórhjólaferð. 

Backstreet Boys

Hljómsveitin Backstreet Boys gerði allt vitlaust þegar þeir komu til Íslands í apríl og héldu tónleika í Laugardalshöllinni.

Hanna Schönberg

Sænska fyrirsætan Hanna Schönberg heimsótti Ísland í ágúst. Hún kom til landsins í myndatöku fyrir fatamerkið NA-KD, en myndirnar voru meðal annars teknar við Seljalandsfoss og í Reynisfjöru.

Jane Seymour

Enska leikkonan Jane Seymour kom til landsins í júlí. Heimsóknin hennar var viðburðarrík, en þegar hún lenti á klakanum tóku á móti henni jarðskjálftar og síðan eldgos við Litla-Hrút.

Rick Steves

Bandaríski ferðabókahöfundurinn og sjónvarpsmaðurinn Rick Steves lét langþráðan draum sinn rætast þegar hann kom til Íslands í júlí, en hann festi kaup á notaðri lopapeysu úr íslenskri ull á flóamarkaði í Reykjavík. 

Emmanuel Macron

Emmanuel Macron, forseti Frakklands, mætti til landsins í maí vegna leiðtogafundar Evrópuráðsins. Hann heimsótti að sjálfsögðu Þingvelli og smellti þar mynd af sér.

Travis Scott

Bandaríski rapparinn Travis Scott kom til landsins í júní, en talið er að hann hafi komið hingað til að taka upp tónlistarmyndband fyrir nýju plötuna sína.

Martha Stewart

Sjónvarpsstjarnan Martha Stewart kom til Íslands í ágúst, en hún fór meðal annars í heimsókn í íslensku súkkulaðigerðina Omnom og skellti sér í Sky Lagoon. 

Amy Poehler

Bandaríska leikkonan Amy Poehler kom til landsins í júlí og birti myndband frá ferðinni á TikTok. Hún heimsótti hina ýmsu staði, til dæmis Bláa Lónið, Geysi og Skólavörðustíg.

Cole Sprouse

Leikarinn Cole Spourse sást á gangi um Laugaveginn í Reykjavík í júlí þar sem hann sást heilsa aðdáendum sínum. 

Kevin McKidd

Leikarinn Kevin McKidd, sem er líklega hve þekktastur fyrir hlutverk sitt í læknadramanu Grey's Anatomy, kom til Íslands í febrúar og heimsótti leikkonuna og rithöfundinn Bergljótu Arnalds. 

Jonas Gahr Støre

Forsætisráðherra Noregs, Jonas Gahr Støre, kom til Íslands í maí þar sem hann mætti á leiðtogafund Evrópuráðsins. Hann mætti þó ekki einungis í Hörpuna þar sem fundurinn var haldinn heldur líka í heita pottinn í Sundhöll Reykjavíkur.

Loreen

Sænska tónlistarkonan Loreen, sem sigraði Eurovision-keppnina 2023, kom til landsins í maí. Hún sást meðal annars á Parliament-hótelinu við Austurvöll, en stuttu áður hafði hún ýjað að samstarfi við íslenskan tónlistarmann. 

Isabelle Huppert

Franska stórleikkonan Isabelle Huppert kom til landsins í lok september, en hún hlaut heiðursverðlaun Alþjóðlegu kvikmyndahátíðarinnar í Reykjavík. 

Manuel Neuer

Þýski knattspyrnumaðurinn Manuel Neuer, markvöður Byern München og þýska landsliðsins, kom til landsins í júlí og gæddi sér meðal annars á bjór á Hvolsvelli.

Justin Trudeau

Justin Trudeau forsætisráðherra Kanada kom til Íslands í júní og birti mynd af sér skælbrosandi á Skólavörðustígnum í Reykjavík og óskaði fólki gleðilega hinsegin daga.

Dan Brown

Bandaríski sakamálahöfundurinn Dan Brown kom til landsins í nóvember og sótti Iceland Noir-bókmenntahátíðina ásamt unnustu sinni.

Fernando Torres

Spænska knattspyrnugoðsögnin Fernando Torres, sem lék meðal annars með Liverpool, Chelsea, AC Milan og Atlético Madrid, kom til Íslands í júní. 

Kacey Musgraves

Bandaríska kántrísönggkonan Kacey Musgraves kom til Íslands í október. Hún skellti sér í Bláa Lónið í ekta íslensku óveðri.