Ferðalög | mbl | 5.2.2024 | 20:00

Ferðaðist með 156 ferðatöskur til Ítalíu

Elizabeth Taylor var ein þekktasta kvikmyndastjarna heims. Ljósmynd/Imdb.com

Þegar Elizabeth Taylor og Richard Burton, sem voru ein þekktustu stjörnuhjón 20. aldar, ferðuðust um heiminn á sjöunda á áttunda áratugnum fylgdi þeim alltaf stór hópur fólks, allt frá förðunar- og hjúkrunarfræðingum yfir í lífverði og þjóna. Þeim fylgdi einnig mikið magn af farangri og meira að segja sérstök manneskja til þess að taka upp úr ferðatöskunum.

Þetta kemur fram í væntanlegri bók Roger Lewis, Erotic Vagrancy, sem fjallar um líf Taylor og Burton.

Samkvæmt vef Page Six segir Lewis frá því í bókinni að leikararnir hafi ferðast með riturum, förðunarfræðingum, húsvörðum, ljósmyndurum, kennurum, lífvörðum, hjúkrunarfræðingum, bílstjórum, viðskiptastjórum, þjónum og jafnvel fólki sem sá um að pakka niður í ferðatöskur.

„Þegar þau sóttu kvikmyndahátíðina í Taormina árið 1967 komu Burton og Taylor með 156 ferðatöskur,“ skrifar Lewis í bókinni. Hann sagði einnig frá því að hjónin hefðu tekið frá 21 herbergi í heimsókn sinni á Hótel Lancaster í París og að hundar þeirra hafi fylgt þeim inn á veitingastaði og einungis fengið mat af matseðlum staðanna.

Stjörnuhjónin ásamt hundunum. Ljósmynd/Imdb.com

Gáfu hundunum sinn eigin bát

Þá kemur einnig fram að hjónin hafi fest kaup á lúxussnekkjunni Kalizma árið 1967 sem státaði af sjö tveggja manna herbergjum, þremur baðherbergjum og vopnabúri sem innihélt vélbyssur. Þegar Burton var við tökur á Where Eagles Land í Lundúnum árið 1968 eru þau sögð hafa gefið hundunum sínum fjórum sinn eigin bát og fest hann nálægt Tower Bridge sem kostaði þúsund pund á viku, en þannig gátu þau sleppt því að senda hundana í einangrun við komuna í Bretlandi.

Ástarsaga Taylor og Burton hófst við upptökur á stórmyndinni Cleopatra árið 1963, en þau gerðu alls ellefu kvikmyndir saman. Árið 1964 giftu þau sig og hefur brúðkaupið iðulega verið kallað „brúðkaup aldarinnar“, en hjónaband þeirra var stormasamt og lauk með skilnaði tíu árum síðar. Hins vegar gengu þau aftur í hjónaband stuttu síðar, en það entist þó aðeins í tæpt ár og skildu þau endanlega árið 1976.