Kolbrún Pálína Helgadóttir sérfræðingur í miðlun og markaðsmálum hjá Ósum hefur verið á ferð og flugi og Ísland í sumar. Hún segist reyndar hafa ferðast mikið um Ísland síðan hún varð móðir en ferðalögin hafi breyst. Nú finnst henni skemmtilegast að ganga um fjöll og baða sig í fossum og ám. Hún fer aldrei út úr bænum nema hafa sundbol með í farteskinu. 

Þú hefur ferðast töluvert um Ísland. Segðu mér betur frá þessum ferðum?

„Ég hef ferðast mikið um landið alveg síðan börnin mín fæddust með ýmsum hætti og faraskjótum. Síðustu ár hef ég meira sótt í að ganga um landið og þannig séð það með öðrum augum en áður og fundið fleiri draumastaði til þess að staldra við á og njóta. Eins þykir mér nú ekki leiðinlegt að baða mig í fossum og lónum þessa lands sem leynast ansi víða, sem og sjarmerandi sveitasundlaugum. Náttúran hefur einstakt aðdráttarafl svo þegar maður byrjar að ferðast um og átta sig á öllum töfrunum sem hún hefur uppá að bjóða er erfitt að hætta,“ segir Kolbrún. 

Aðspurð að því hvort hún hafi alltaf verið náttúrubarn segir hún svo vera.  

„Líklega hef ég alltaf verið mikið náttúrubarn. Mér hefur til dæmis aldrei liðið neitt sérstaklega vel í stórborgum og ég þarf helst að sjá til sjós. Í dag er náttúran orðin miklu stærri og eðlilegri partur af mínu daglega lífi en áður. Hún gefur mér í raun það sem ég þarf til þess að þrífast í þessu hraða samfélagi sem við lifum við hérna á malbikinu. Í náttúrunni finn ég jafnvægi, frið, orku og gleði og þar fæ ég mínar bestu hugmyndir. Um helgar kýs ég til dæmis frekar að skjótast aðeins út fyrir bæjarmörkin til að viðra mig og fá mér kaffi, frekar en annað hafi ég tök á. Það er bara eitthvað við það að keyra út úr borginni,“ segir hún. 

Ertu orðin sérfræðingur í landinu Íslandi?

„Fjarri lagi. Mér líður eins og ég sé rétt að byrja að kynnast þessu stórkostlega landi sem við eigum. Ég er sem dæmi bara enn að uppgötva gönguleiðir í nágrenni við höfuðborgina sem mér finnst alltaf jafn merkilegt. Það gefur mér mikið að vera að vinna í því að kynnast landinu betur, læra á náttúruna og allt sem hún hefur upp á að bjóða og ég verð bara forvitnari og forvitnari.“

Hvenær kviknaði ferðabakterían?

„Ég hef alltaf haft þörf fyrir ferðalög. Fyrir mér eru þau hleðsla á alla tankana mína. Á ferðalögum kynnist maður nýju fólki, annarri menningu, öðruvísi hefðum, fær innblástur að mat og menningu svo fátt eitt sé nefnt. Ég tek yfirleitt ofboðslega mikið af myndum þegar ég er á ferðinni af öllu því sem heillar augað. Það er svo gott að ylja sér við þær síðar og minna sig á það sem hreyfði við manni,“ segir Kolbrún. 

Hvernig skipuleggur þú ferðalög?

„Ég myndi segja að ég væri frekar hvatvís ferðalangur og stekk hratt til ef það er góð hugmynd á sveimi um skot í sveitina, gönguferð eða annað í þeim anda. Lykillinn er að ofhugsa hlutina ekki, vera með gott skipulag á útivistar fatnaðnum og töskum svo hægt sé að pakka hratt og örugglega. Hinsvegar eru alltaf einhverjir fastir punkta á dagatalinu sem er gott að eiga þegar farið er inn í veturinn eins og eins stór sumarganga með vinkonum mínum og þess háttar sem við nýtum veturinn til að æfa okkur fyrir. Eins kann ég mjög vel að meta ferðir erlendis með litlum fyrirvara. Svo bara passa að vegabréfið renni ekki út,“ segir hún og hlær. 

Hvað er mikilvægast að taka með sér í ferðalög?

„Það er auðvitað ákveðin listgrein að pakka fyrir íslensk ferðalög. Sumir myndu segja það streituvaldandi enda ekkert á hreinu nema óvissan sjálf þegar kemur að veðri og vindum. Ullin góða hefur komið sér vægast sagt vel og er gott að eiga nokkur lög af henni þar sem það fer lítið fyrir henni. Svo er það allt frá stuttbuxum yfir í skel og góðan skóbúnað sem skiptir sköpun. Það er þessi dans að verða ekki of heitt eða of kalt þegar maður er að iðka hreyfingu úti. Annars keyri ég ekki úr hlaði án þess að vera með sundföt í skottinu þar sem það er alltaf veður fyrir vatnabrölt og sjósund.“

Hvað er uppáhaldsnestið þitt á ferðalögum?

„Fyrir göngurnar er það flatbrauð, egg, harðfiskur, kaffi, Powerade og blanda af öllu því besta í poka frá MUNA eins og döðlum, hnetum, rúsínum, hrískökum og fleira sem ég set í poka. Annars elska ég öll tilefni til þess að setja saman í gott nesti eða „nibberí“ eins og það er kallað hjá okkur vinunum. Það er klárlega partur af áhugamálinu líka.“

Hvað er nibberí? 

„Nibberí er reyndar orð sem ég virðist hafa búið til sjálf eða íslenska útgáfan af enska orðinu “nibble“. Ég var farin að sletta þessu hingað og þangað við nestisplön, bakkagerð og undirbúning þegar ég àttaði mig á því að það kannaðist enginn við orðið. Þetta endaði svo þannig að vinnufélagar mínir, sem eru miklir gleðigjafar, færðu mér lénið nibberi.is í afmælisgjöf fyrir stuttu,“ segir hún og hlær. 

Hvað hefur það gefið þér að ferðast um Ísland í sumar?

„Ómælda ánægju, magnaðar samverustundir, djúp samtöl, sterkari tengingu við sjálfan mig og náttúruna og friðsælt taugakerfi.“

Þú hefur verið dugleg að ferðast með vinkonum þínum. Hvernig varð þessi félagsskapur til? 

„Ég var svo heppin að komast inn í mjög magnaðan gönguhóp fyrir nokkrum árum sem fer eina stóra göngu á sumrin. Hópurinn saman stendur af harðduglegum fjölskyldukonum sem er annt um heilsuna, elska útivist og eiga það sameiginlegt að vera miklir pepparar og valdeflandi félagsskapur. Við höfum meðal annars gengið Græna hrygg, Þórsmörk og margar fleiri fallegar leiðir. Svo tókum við okkur til; ég og Unnur María Pálmadóttir vinkona mín og bjuggum til eina dekurferð á Hótel Geysi svona yfir háveturinn fyrir okkar bestu konur þar sem sjálfsást og gleði er í fyrirrúmi. Á milli þessara föstu punkta erum við svo mjög duglegar við að peppa hvor aðra í hreyfingu, útivist, fargufu, sjósund og bara hvað sem okkur dettur í hug að gera skemmtilegt. Svo hittumst við nú stundum bara í garðinum og grillum með fjölskyldunum og njótum þess að vera til.“

Hver er fallegasti staðurinn á landinu að þínu mati?

„Þórsmörk er án efa einn af mínum uppáhaldsstöðum á landinu. Það er eitthvað ólýsanlegt við að vakna þar, hella sér upp á kaffi og plana daginn í þessu ævintýralega umhverfi.“

Áttu þér uppáhaldsveitingastað úti á landsbyggðinni?

„Vínstofan í Friðheimum er dásamlegur staður þar sem allt er fallegt, bæði fyrir augun og bragðlaukana.“

Hver eru plönin þín fyrir veturinn? Eru fleiri ferðalög í kortunum?

„Plönin fyrir veturinn er að hugsa vel um heilsuna, iðka alls konar hreyfingu og vera tilbúin í ævintýrin þegar þau koma. Dekurferð á Hótel Geysi er komin á kortið og svo svona eins og kannski flestir landsmenn þá er maður aðeins að skoða hvert flugfélögin eru að fljúga á næstunni,“ segir Kolbrún.