Ferðalög | Ferðalög erlendis | mbl | 14.8.2024 | 8:00

8 faldar perlur í Frakklandi sem þú mátt ekki missa af

Á listanum finnur þú átta sjarmerandi staði í Frakklandi. Samsett mynd

Frakkland hefur notið mikillar athygli á undanförnum vikum, en Ólympíuleikarnir voru haldnir í höfuðborginni, París, nú á dögunum. Auk höfuðborgarinnar kannast flestir við staði eins og Nice, Lyon og Marseille sem eru vinsælustu borgir landsins, en Frakkland hefur upp á margt fleira að bjóða.

Á dögunum tók ferðavefur Condé Nast Traveller saman lista yfir fegurstu staðina í Frakklandi, en á listanum leyndust faldar perlur sem færri vita af og munu eflaust rata inn á laupalista (e. bucket list) einhverra lesenda.

Annecy-vatn

Í Haute-Savoie í Frakklandi er að finna þriðja stærsta vatn Frakklands, Annecy-vatn, sem býr yfir einstakri náttúrufegurð. Mikið af skemmtilegum gönguleiðum eru í nágrenni við vatnið, en á sumrin er vinsælt að sigla um vatnið og þeir djörfustu stinga sér til sunds.

Svæðið býður upp á ótal möguleika til útivistar. Ljósmynd/Unsplash/Kyle Evans

Cassis

Á hinni eftirsóttu strandlengju sem flestir þekkja sem frönsku rivíeruna er bærinn Cassis. Hann býr yfir miklum töfrum, sjarmerandi byggingum og ljúffengri matarsenu sem hefur heillað ófáa ferðalanga í gegnum árin.

Cassis hefur heillað ófáa í gegnum árin. Ljósmynd/Unsplash/Killian Cartignies

Klettarnir í Étretat

Á Alabaster-strönd Frakklands eru hinir undurfögru klettar í Étretat. Ströndin er vinsæl meðal brimbrettakappa, en flestir sem koma á ströndina eru þó með eitt markmið – að bera klettana frægu augum.

Ströndin býður upp á magnað sjónarspil. Ljósmynd/Unsplash/Benoît Deschasaux

Camargue

Í suðurhluta Frakklands sunnan við borgina Arles er að finna strandhéraðið Camargue. Sumir lýsa staðnum eins og annarri heimsálfu, en þar er vinsælt að fara í jeppaferðir um óbyggðirnar og kynnast dýralífinu sem einkennist af hvítum hestum, bleikum flamingóum og um 400 mismunandi fuglategundum til viðbótar.

Hvítir hestar ganga lausir um svæðið. Ljósmynd/Unsplash/Getty

Versalahöll

Í Versölum í Frakklandi stendur hinn goðsagnakenndi kastali Versalahöll frá 18. öld. Kastalinn býr yfir miklum lúxus og þar má sjá einstaka list, arkitektúr, innanhússhönnun og landmótun.

Kastalinn býður upp á ótal margt. Ljósmynd/Unsplash/Xavier Photography

Biarritz

Í suðvesturhluta Frakklands stendur borgin Biarritz sem er í sérstöku uppáhaldi sem sumarleyfisstaður meðal kóngafólks og fræga fólksins. Þar finnur þú himneskar strendur, lúxushótel og veitingastaði sem kitla bragðlaukana.

Biarritz er í sérstöku uppáhaldi hjá kóngafólkinu og fræga fólkinu. Ljósmynd/Unsplash/Mathilde Langevin

Menton

Menton er sveitafélag á frönsku rivíerunni nálægt ítölsku landamærunum sem er þekkt fyrir mikla veðursæld, en þar eru að meðaltali yfir 316 sólskinsdagar á ári. Svæðið ætti því að falla vel í kramið hjá sólþyrstum Íslendingum.

Í Menton eru sjarmerandi byggingar í forgrunni. Ljósmynd/Unsplash/Olivie Strauss

Mont Blanc

Margir kannast við fjallið Mont Blanc sem stendur á landamærum Frakklands og Ítalíu. Fjallið er gríðarhátt, en það er 4.805 metrar á hæð og er hæsta fjall Alpanna og sömuleiðis hæsta fjall í Vestur-Evrópu.