Myndband: Í návígi við hnúfubak í Reynisfjöru
Setja bókamerki
Tengdar fréttir
Skoðunarferðir
Marga ferðalanga dreymir um að sjá hval með berum augum í Íslandsferð sinni. Ljósmyndarinn Alina Rudya var hins vegar ekki að búast við því að fá drauminn uppfylltan þegar hún heimsótti Reynisfjöru í Mýrdal þann 12. ágúst síðastliðinn, ekki frekar en aðrir ferðalangar sem stóðu agndofa á ströndinni og fylgdust með hnúfubak synda meðfram ströndinni.
Rudya birti myndskeið af atvikinu á TikTok-reikningi sínum og hefur það hlotið þó nokkra athygli. „Sjónarhorn: Þú heimsækir hina frægu svörtu strönd Íslands og hnúfubakur lætur óvænt sjá sig,“ skrifaði hún við myndbandið.
Félagslyndar verur sem hræðast ekki fólk
Þetta er ekki í fyrsta sinn sem hnúfubakur lætur sjá sig í Reynisfjöru, en hvalina má sjá allt í kringum Ísland, þá sérstaklega á sumrin. Hnúfubakar eru sagðir félagslyndar verur sem hræðast ekki fólk, en Edda Elísabet Magnúsdóttir, lektor í líffræði við Háskóla Íslands og hvalasérfræðingur, ræddi um hvalategundina í samtali við mbl.is í sumar þegar um tíu hnúfubakar spókuðu sig við höfnina í Borgarfirði eystri.
„Þetta er ekkert alóvanalegt en þetta er eina stórhvalategundin, hér í þessum hluta heimsins getum við sagt eða allavega í kringum Ísland, sem á það til að koma inn í miklar grynningar ef það er einhverja girnilega fæðu að hafa,“ sagði Edda.
Þá eru á bilinu 11.000 til 15.000 hnúfubakar sem halda sig við Íslandsstrendur og teygja sig til Grænlands og Færeyja, en að sögn Eddu virðist sem svo að stofninn sé stöðugur.
Tengdar fréttir
Skoðunarferðir
Mjög alvarlegt ef Njarðvíkuræð gefur sig
Óttast að fólk fari aftur að eyða peningum
Erlendir miðlar greina frá tíunda gosinu
Sparnaður heimila vex meira en áður var talið
Á algjöru frumstigi eftir þrjár vikur af verkfalli
Átti ekki að láta pirring bitna á sjúklingi
Hraun fór yfir Grindavíkurveg
