Töluverður fjöldi fólks var í Bláa lóninu, eða um 1.300 manns, þegar svæðið var rýmt í gærkvöldi vegna eldgossins við Sundhnúkagíga. Ferðabloggararnir Andrew og Ale Kenny voru á meðal gesta og hafa deilt upplifun sinni á TikTok.

Frétt af mbl.is

1.300 manns í lóninu er gos hófst

Parið deildi tveimur myndböndum á miðlinum sem hafa bæði fengið mikla athygli, en samanlagt hafa yfir 1,4 milljónir horft á myndböndin. 

„Við borguðum ekki einu sinni“

Í fyrra myndbandinu sést Andrew í inngangi Bláa lónsins þar sem hann bíður eftir Ale, en í bakgrunni má heyra í viðvörunarflautunum. „Viðvörunarflautur vegna eldgoss eru í gangi. Ég er að bíða eftir Ali og restinni af hópnum. Við fórum í heitu laugina, en í alvörunni, raunveruleg viðvörunarflauta vegna eldgoss er í gangi núna. Þetta er klikkað. Ég trúi þessu ekki. Þeir rýmdu allt Bláa lónið. Við verðum að fara. Þetta er ruglað,“ segir hann í myndbandinu. 

Stuttu síðar birtu þau annað myndband þar sem þau sjást yfirgefa Bláa lónið. „Frekar skelfileg upplifun. Það er verið að rýma Bláa lónið á Íslandi vegna þess að eldvirkni hefur mælst. Það er frekar ógnvekjandi þegar viðvörunarflauturnar fara í gang þegar þú ert lengst ofan í lauginni. Þeir drifu okkur upp úr, við erum enn rennandi blaut,“ segir Ale. 

„Ekki skipta um föt, ekki fara í sturtu, drífið ykkur í burtu. Við borguðum ekki einu sinni, við vorum með armbönd með innistæðu og allt, þeir voru bara: „Drífið ykkur í burtu, farið út,“ bætir Andrew við. 

Tengdar fréttir

Eldvirkni á Reykjanesskaga

Virkni á tveimur svæðum: Eldgosið í jafnvægi

• Hámarkshraðinn lækkaður niður í 50 á brautinni
• Uggandi yfir innviðum í norðri
• Göngumaður féll í sprungu í nótt
• Sprungan um sjö kílómetra löng

» Fleiri tengdar fréttir

• Blogga um frétt