Ferðalög | mbl | 11.2.2025 | 20:00

Þingvallavélin flýgur nú fyrir félag í Úsbekistan

Íslensku fánalitirnir svífa um yfir Úsbekistan. Skjáskot/Facebook

Boeing 757-300 í íslensku fánalitunum úr flota Icelandair, eða Þingvallavélin, hefur fengið nýtt hlutverk en heldur sama útliti. Vélin var tekin úr flota flugfélagsins á síðasta ári.

Í dag flýgur hún fyrir flugfélagið Fly Khiva Uzbekistan, sem hóf fyrstu farþegaþjónustu sína í desember á síðasta ári og flýgur á milli höfuðborgarinnar Tasjkent og Urgench, í vesturhluta Úsbekistan. Þetta kemur fram á vef Airways Magazine.

Þá er áhugavert að sjá að einungis merki vélarinnar var breytt en lítið var haft fyrir að skipta út einkennislitum íslenska fánans á vélinni. Þess má geta að fánalitir Úsbekistan eru blár, hvítur og grænn.

Nýtt félag

„Vélin er komin í leiguverkefni í Úsbekistan en er ennþá í skráningu hjá Icelandair,“ segir Guðni Sigurðsson, samskiptastjóri Icelandair. „Þetta er nýtt félag. Þeir hafa verið með fragtflug og við höfum líka leigt þeim vélar í það. Núna eru þeir byrjaðir með farþegaflug og fengu okkar 757-300 sem hét Þingvellir, hjá okkur, og eru búnir að setja sitt merki á hana.“

Spurður um ástæðuna fyrir því að Icelandair sé að skipta út flotanum svarar Guðni: „Við erum að fasa út 757 vélunum okkar með endurnýjun flugflotans bæði með nýjum 737 Max-vélum og svo erum við komin með eina Airbus A-321 og verðum komin með fjórar fyrir sumarið.“

Guðni bætir því við að Þingvallavélin fari í skráningu hjá Fly Khiva Uzbekistan í vor og fái allsherjaryfirhalningu næsta haust.

Þangað til geta íbúar Úsbekistan notið þess að sjá íslensku fánalitina þeysast um fagurbláan himininn.