Íslenskt par lifir á samfélagsmiðlum í Ástralíu
Setja bókamerki
Tengdar fréttir
Á ferðalagi
Hin 25 ára, Birta Hlín Sigurðardóttir og unnusti hennar, Helgi Jónsson, hafa notið mikilla vinsælda á samfélagsmiðlum að undanförnu. Parið er búsett í Kaupmannahöfn þar sem þau starfa bæði sem áhrifavaldar. Nýlega tóku þau stökk yfir hálfan hnöttinn til Ástralíu en landið hefur einmitt verið draumastaður parsins.
„Okkur hefur lengi langað að ferðast til Ástralíu og þar sem vinnan okkar er sveigjanleg ákváðum við að nýta tækifærið núna og flýja skammdegið í Köben. Markmiðið með dvölinni er að búa til skemmtilegt og spennandi efni fyrir samfélagsmiðlana okkar, kynnast nýju fólki og nýrri menningu og njóta góða veðursins,“ segir parið.
Sydney enn betri en þau þorðu að vona
Áhugi Birtu á Ástralíu kviknaði snemma, með áhrifum frá áströlskum „YouTuberum“ sem hún fylgdist með í æsku. Parið sótti um dvalarleyfi sem veitir þeim heimild til að dvelja í landinu í allt að þrjá mánuði og hyggjast þau dvelja þar þangað til í mars.
Það tók smá tíma fyrir parið að ákveða hvar þau ættu að staðsetja sig en að lokum varð Sydney fyrir valinu og urðu þau ekki fyrir vonbrigðum.
„Okkur hefur liðið mjög vel alveg frá fyrsta degi! Borgin er hrein, framandi, örugg og fólkið er hlýlegt og tilbúið í spjall. Satt að segja er Sydney enn betri en við áttum von á,“ útskýrir parið.
Tók tíma að venjast nýrri rútínu
Það tók smá tíma fyrir Birtu og Helga að venjast nýrri rútínu og menningu. Þau segja fólk í Ástralíu meira fyrir það að byrja daginn snemma og enda því daginn frekar fyrr.
„Það sem kom okkur mest á óvart er hvernig lífsstíllinn er aðeins öðruvísi hér. Sérstaklega þegar við bjuggum rétt hjá Bondi-ströndinni, þá er fólk komið eldsnemma á fætur og um sexleytið iðar allt af lífi. Þá er fólk farið út að hlaupa eða kaupa sér kaffi. Þegar við höfum farið út að skemmta okkur með vinum þá kom okkur líka mikið á óvart að allir skemmtistaðir loka um miðnætti eða klukkan eitt, líka um helgar.“
Daglegt líf í Sydney
Parið segist hafa áttað sig á því hve mikið það hafði keyrt sig út í vinnu áður en þau komu til Ástralíu. Þess vegna ákváðu þau að leggja meiri áherslu á frítíma og hvíld meðan á dvölinni stendur, og segja Sydney hafa reynst fullkominn stað til þess.
„Seinustu ár höfum við ekki verið að forgangsraða frítíma og hvíld, þar sem línan milli vinnu og frítíma hefur verið frekar óljós. Við ákváðum því að nýta tímann hér í sólinni til að hvíla okkur og byggja upp góða rútínu sem innifelur hreyfingu, næringarríkan mat og að kunna að aftengja okkur frá vinnunni. Hugsa betur um heilsuna okkar, lesa meira, fara í göngutúra og skrifa í dagbók. Sydney hefur verið fullkominn staður til að iðka þennan lífsstíl og við finnum þegar fyrir aukinni orku og hamingju.“
Hvað hefur staðið upp úr
Meðal eftirminnilegustu stunda í Sydney voru áramótin á Bondi- og Milk-ströndunum.
„Við fengum okkur pítsur og horfðum á sólsetrið við Bondi-ströndina, áður en við fórum á Milk-ströndina til að sjá flugeldasýninguna við óperuhúsið. Fólk var búið að tjalda og bíða í nokkra klukkutíma til að tryggja sér besta útsýnið. Við vorum heppin og nældum okkur í góðan stað og horfðum á stórkostlega sýningu sem hringdi inn nýja árið. Alveg mögnuð upplifun!“
Næst á dagskrá
Næst á dagskrá hjá parinu er að taka bát yfir til Manly sem er staðsett norðan við miðbæ Sydney. Svo hyggjast þau kíkja til Melbourne áður en þau halda aftur til Kaupmannahafnar.
„Margir af fylgjendunum okkar eru að hvetja okkur til að fara þangað. Melbourne er víst mjög lifandi borg með fjölbreytt hverfi og sterka kaffimenningu, sem keppir við þá bestu í heiminum. Borgin er líka þekkt fyrir listir og frábæra matarmenningu, þannig að við getum ekki beðið eftir að skoða hvað Melbourne hefur upp á að bjóða.“
Ung en reynslumikil á samfélagsmiðlum
Birta Hlín er langt í frá nýgræðingur í netheimum. Hún byrjaði að búa til myndbönd á YouTube þegar hún var aðeins 14 ára gömul, en dró sig tímabundið í hlé eftir að hafa fengið leiðinleg ummæli.
Í kórónuveirufaraldrinum sneri hún aftur af fullum krafti og hefur síðan notið mikilla vinsælda á YouTube, Instagram og TikTok. Núna er hún með tæplega 200 þúsund fylgjendur á TikTok og Instagram og tæplega 300 þúsund áskrifendur á YouTube, þar sem hún hefur jafnframt vakið athygli fyrir persónulegt efni og sjarmerandi stíl.
Helgi og Birta hafa einnig vakið athygli fyrir jákvætt og einlægt lífsviðhorf sitt. Þau trúlofuðu sig í borg ástarinnar, París, og hafa verið dugleg að deila ferðalögum sínum með fylgjendum sínum.
/frimg/1/37/69/1376918.jpg)
Draumur um búsetu til lengri tíma
Aðspurð hvort þau myndu vilja setjast að í Ástralíu til lengri tíma, segjast Birta og Helgi vissulega gæla við þá hugmynd:
„Sydney er ábyggilega uppáhalds borgin okkar af þeim sem við höfum heimsótt og það væri alveg yndislegt að búa hér til lengri tíma. Það eru svo ótrúlega margir kostir við þessa borg og við finnum hvað okkur líður vel hér. Eini ókosturinn er að sjálfsögðu hvað við erum langt í burtu frá vinum og fjölskyldu,“ segja þau.
Parið er sannfært um að þetta verði ekki síðasta ferð þeirra til Ástralíu. Sú einstaka upplifun sem þau hafa notið – allt frá hlýju veðri til ótrúlegrar gestrisni hefur þegar stimplað landið sem einn af þeirra uppáhaldsáfangastöðum.
Hér fyrir neðan er hægt að horfa á YouTube-færslu frá Birtu Hlín þar sem hún deilir frá fyrstu dögunum í Sydney.
Tengdar fréttir
Á ferðalagi
Ekki sannfærður um túlkun Veðurstofunnar
Umferðarslys á Reykjanesbraut
Úlfar: Það þarf að halda vöku sinni
Virðist vera „lítill leki“ frá stærri atburði
/frimg/1/55/49/1554964.jpg)
Vilja banna einkaþotur og þyrluflug
Gosið ekki „mjög aðlaðandi“ að sjá frá brautinni
Kvika komin mjög norðarlega: Færist nær brautinni
