Óvæntur farþegi bættist í hópinn í leigubíl í London á dögunum þegar kona nokkur fæddi barn í bílnum. 

Leigubílstjórinn Gary Wilson var að aka verðandi foreldrum á Háskólasjúkrahúsið í London á fimmtudaginn síðastliðinn þegar verðandi móðirin fæddi barnið. 

Á leiðinni báðu þau Wilson að stoppa í vegkantinum og „allt í einu var barnið komið út“, sagði Wilson í viðtali við BBC. Lítil stúlka kom í heiminn við þessar óvenjulegu aðstæður. Hún hefur fengið nafnið Camille og heilsast öllum vel að sögn fjölskyldunnar. 

Sjúkraflutningamenn komu síðar og færðu fjölskylduna á sjúkrahúsið. Þegar Wilson var að aka parinu á sjúkrahúsið spurði faðirinn verðandi hversu langan tíma tæki að keyra þangað. Stuttu seinna sagði hann að þau kæmust líklega ekki á leiðarenda fyrr en barnið kæmi út. 

„Ég heyrði mikinn hávaða í mömmunni í aftursætunni og hugsaði bara „Guð minn góður“,“ sagði leigubílstjórinn. Eftir að faðirinn hafði hringt í spítalann og neyðarlínuna lét hann bílstjórann fá símann sem gaf þeim upp nákvæma staðsetningu á meðan barnið kom í heiminn.

„Eftir minna en hálftíma kom pabbinn út úr leigubílnum með barnið og baðst afsökunar á útganginum í bílnum,“ sagði Wilson. Foreldrarnir, sem ekki vildu láta nafns getið, þökkuðu síðar Wilson fyrir aðstoðina og bættu við að þau myndu aldrei gleyma honum eða leigubílnum.

Tengdar fréttir

Meðganga og fæðing

Mandy Moore fæddi stúlkubarn

• Fanney Dóra og Aron eignuðust son
• Móðir í annað sinn örfáum mánuðum eftir legnám
• Jóhanna Helga og Geir eignuðust dreng
• Katla fæddi þriðja soninn á mettíma

» Fleiri tengdar fréttir

• Blogga um frétt