Fæðingin það erfiðasta sem Annie hefur upplifað

Crossfitstjarnan Annie Mist Þórisdóttir opnaði sig um fæðingu dóttur sinnar á Instagram á sunnudaginn en Annie eignaðist dóttur í síðustu viku með kærasta sínum Frederik Aeg­idius. Annie sagði meðgönguna hafa gengið vel en fæðingin var öllu erfiðari. 

„Að fæða barn er töfrandi. Þú gengur með þetta í níu mánuði, sérð fyrir þér komuna með öllu því góða og erfiða sem kemur með því,“ skrifaði Annie sem viðurkenndi að hafa séð fyrir sér fæðinguna eins og 99 prósent af fæðingum á Íslandi. Hún segir þó að þegar á hólminn var komið var hennar fæðing ekki þannig. 

„Laugardaginn 8. ágúst, þremur dögum eftir settan dag vaknaði ég snemma með mjög sársaukafulla samdrætti. Klukkan tíu um kvöldið fór ég á spítalann af því að vatnið fór fyrr um daginn og það þurfti að fylgjast með heilsu barns míns. Ég fékk verkjalyf til þess að reyna að sofa og vegna COVID-19 þurfti ég að vera ein þar sem að Frederik mátti ekki koma fyrr en ég var komin lengra inn í fæðinguna,“ skrifaði Annie. 

Klukkan þrjú daginn eftir fékk Frederik að koma til Annie. Þau komust þó að því að dóttir þeirra var ekki í góðri stöðu. Andlitið vísaði upp og hallaði til hliðar og tók stúlkan því mikið pláss. Annie segir að þau hafi vonast til þess að hún snéri sér auk þess sem starfsfólk reyndi að snúa henni án árangurs. 

Frétt af mbl.is

Á ekki orð yfir styrk Annie eftir fæðinguna

„Við enduðum á skurðstofu fyrir sogklukku – tilbúin fyrir bráðakeisara. Með yfir tíu manns í herberginu, fjórir af þeim héldu mér á meðan ég rembdist, með sogklukku á höfðinu byrjuðum við. Eftir fimm tilraunir til þess að fá hana til að hreyfa sig og öflugasta rembing lífs míns fengum við hana út. 

Á mánudaginn klukkan 12:16 eftir ég veit ekki hvað marga klukkutíma í fæðingu kom litla stelpan mín í heiminn án hljóðs og það voru erfiðustu mínútur í lífi mínu. Svo allt í einu svakalega sterkur grátur og 100 prósent heilbrigð,“ skrifaði Annie. Dóttir hennar var 3.904 grömm þegar hún fæddist og 54 sentímetrar. 

Annie segir að dóttir hennar sé það mikilvægasta í lífi hennar. Hún er einnig afar þakklát ljósmæðrunum og læknunum á spítalanum.

„Ég endaði á því að missa yfir tvo lítra af blóði og á langan bata fyrir höndum,“ skrifaði Annie sem segist þó jafna sig með kærasta og dóttur sér við hlið. 

• Blogga um frétt