Vilhjálmur Bretaprins viðurkenndi í viðtali að það hefðu verið langir fimm mánuðir sem börn hans máttu ekki fara í skólann út af kórónuveirunni. Hann sagði að eldri börnin, Georg og Karlotta, hefðu farið í skólann fyrir nokkrum dögum.
Prinsinn sagði þó að það hefði verið yndislegt að hafa þau heima allan daginn en hann hafi verið meira en tilbúinn að sjá á eftir þeim í skólann.
„Ég held að öllum foreldrum hafi verið mjög létt þegar skólarnir hófust á ný. Fimm mánuðir, þetta hefur verið yndislegt en þetta voru langir fimm mánuðir,“ sagði Vilhjálmur.
Yngsti sonur Vilhjálms og Katrínar hertogaynju, Lúðvík, er þó bara tveggja ára og því ekki byrjaður í skóla.